Fjármálageirinn greiðir tæplega þriðjung allra opinberra gjalda

Fyrirtæki í fjármála- og vátryggingastarfsemi greiða tæplega þriðjung allra opinberra gjalda hér á landi, að því er fram kemur í ársriti Samtaka fjármálafyrirtækja sem kemur út í dag. Hefur skattbyrði umræddra fyrirtækja aukist um 233 prósent frá árinu 2010, en á sama tíma hefur tekjuskattsstofninn aðeins aukist um 79 prósent.

Umfjöllun samtakanna er byggð á skýrslu fjármála- og efnahagsráðherra um skatttekjur, skattrannsóknir og skattaeftirlit sem lögð var fyrir síðasta löggjafarþing.

Alls greiddi fjármála- og vátryggingageirinn tæpa 50 milljarða króna í opinber gjöld í fyrra, en þar af greiddu aðildarfélög samtakanna tæpa 40 milljarða. Í ársritinu er auk þess bent á að arðgreiðslur stóru viðskiptabankanna þriggja – Arion banka, Íslandsbanka og Landsbankans – hafi numið um 200 milljörðum frá árinu 2013. Er hluti ríkisins í þeim um 150 milljarðar. Aðildarfélög samtakanna hafi þannig greitt tæplega 400 milljarða króna til ríkisins frá árinu 2009.

Samtökin taka fram að hvergi í Evrópu sé skattlagning á fjármálafyrirtæki hærri en hér á landi. Auk þess sé leitun að ríkjum sem leggi fleiri sérstaka skatta, eins og bankaskatt og fjársýsluskatt, á rekstur slíkra fyrirtækja. Segja samtökin sérstöku skattana rýra að óbreyttu heildarvirði bankakerfisins um allt að 280 milljarða króna en ríkið fer sem kunnugt er með stærstan hluta eignarhalds þess.