Marel hagnast um 2,5 milljarða

Hagnaður Marels á fyrsta ársfjórðungi nam 21,3 milljónum evra, eða tæpum 2,5 milljörðum króna. Um er að ræða töluverða aukningu en hagnaðurinn nam 13,8 milljónum evra á sama tímabili í fyrra. 

Fram kemur í tilkynningu að tekjur á fyrsta ársfjórðungi 2017 námu 252,5 milljónum evra, 29 milljörðum króna, sem er örlítil aukning milli ára.

EBITDA á fyrsta ársfjórðungi 2017 var 46,0 milljónir evra sem er 18,2 prósent af tekjum og um 8 milljón evra aukning milli ára. Pro forma EBITDA á fyrsta ársfjórðungi 2016 nam 42,5 milljónum evra eða 18,2 prósent af tekjum.

Handbært fé frá rekstri fyrir fjármagnsliði og skatta nam 37,9 milljónum evra á fyrsta ársfjórðungi 2017 og jókst um 10 milljónir evra milli ára. 

Pantanabókin stóð í 390,3 milljónum evra við lok fyrsta ársfjórðungs 2017 samanborið við 349,5 milljónir evra í lok fjórða ársfjórðungs 2016.

Fram kemur í tilkynningu að nýjar pantanir á fyrsta ársfjórðungi 2017 námu 293 milljónum evra sem dreifast vel á milli kjúklinga-, kjöt- og fiskiðnaða auk þess að vera vel dreifðar á milli vöruflokka og heimsálfa. Pantanabókin stendur í 390 milljónum evra og hefur aldrei verið stærri. Til samanburðar var pantanabókin 340 milljónir evra á sama tíma fyrir ári síðan.

Fjárhagsstaða félagsins er traust og sjóðsstreymi sterkt. Á fyrsta ársfjórðungi 2017 samþykkti aðalfundur Marel að greiða hluthöfum arð og að kaupa eigin bréf fyrir samtals 22,1 milljónir evra. 

Marel hefur tryggt framlengingu á fjármögnun félagsins á hagstæðum kjörum sem endurspegla fjárhagslegan styrk Marel og markaðsaðstæður. Fjármögnunin nemur um 640 milljónum evra á vaxtaálaginu EURIBOR/LIBOR + 185 bps, sem mun breytast með skuldsetningarhlutfalli félagsins við lok hvers ársfjórðungs. Lokagjalddagi fjármögnunarinnar er í maí 2022. Þessar breytingar auka sveigjanleika í rekstri og styðja við metnaðarfulla áætlun félagsins um vöxt og virðisaukningu til lengri tíma litið sem kynnt var á aðalfundi félagsins í mars síðastliðnum.