Forkaupsrétturinn úti

Nefndarmenn í efnahags- og viðskiptanefnd Alþingis líta svo á að ríkið hafi ekki heimild til að nýta sér forkaupsrétt að hlutnum sem Goldman Sachs og þrír vogunarsjóðir keyptu í Arion banka, samkvæmt heimildum Fréttablaðsins. Þetta sé skoðun þeirra eftir að Steinar Þór Guðgeirsson, sérstakur eftirlitsmaður stjórnvalda inni í Kaupþingi við söluferlið á Arion banka, mætti á lokaðan fund nefndarinnar í gær.

Samkvæmt stöðugleikaskilyrðum sem kröfuhafar Kaupþings féllust á í tengslum við nauðasamninga 2015 hafa stjórnvöld heimild til að ganga inn í kaup ef hlutur í Arion banka er seldur á undir 80 prósentum af eigin fé bankans hverju sinni.

Sigmundur Davíð Gunnlaugsson, fyrrverandi forsætisráðherra, ásamt tveimur öðrum þingmönnum Framsóknarflokksins lagði fram þingsályktunartillögu í síðustu viku þar sem kallað er eftir því að Alþingi feli fjármálaráðherra að nýta þann forkaupsrétt. Í tillögunni er bent á að hluturinn hafi verið seldur undir genginu 0,8 miðað uppgjör Arion banka í árslok 2016.

Á nefndarfundinum í gær kom hins vegar fram að samkomulagið við vogunarsjóðina og Goldman Sachs hafi miðast við þriðja ársfjórðung 2016 og gengið sé því yfir 80 prósentum af eigin fé. Það sé einnig tilfellið ef farið er algjörlega eftir enska textanum í samningnum og miðað við árslok 2015, en þá væri gengið langt fyrir ofan. Því sé ljóst að forkaupsrétturinn sé úti.

Samkvæmt heimildum Fréttablaðsins vilja nefndarmenn í efnahags- og viðskiptanefnd að Fjármálaeftirlitið framkvæmi hæfismat á nýju hluthöfunum í Arion banka, þrátt fyrir að enginn þeirra fari nú með virkan eignarhlut. Forsvarsmenn FME hafa áður gefið út að undirbúningur að slíku hæfismati sé nú þegar hafinn. Þrír hinna nýja hluthafa Arion banka hafi enda þegar upplýst FME um að þeir hafi hug á því að fara með virkan eignarhlut síðar á árinu.

Fréttablaðið greindi frá því í gær að Fjármálaeftirlitið telji sig geta upplýst um hverjir endanlegir eigendur séu á hlutnum aukist hlutur hvers þeirra í yfir 10 prósent og að þeir fari þá með virkan eignarhlut. Kallað hefur verið eftir því að eignarhaldið verði skýrt áður en slíkt gerist.

Jónas Fr. Jónsson, fyrrverandi forstjóri Fjármálaeftirlitsins, telur að það þurfi að skoða hvort kominn sé virkur eignarhlutur hjá vogunarsjóðunum með þessum kaupum og núverandi aðkomu þeirra að Kaupþingi og þeirri fyrirætlun sem virðist koma fram í kauprétti, að eignast meira í bankanum.