Rappari hellir víni í glös og þrífur klósett

Rapparinn Emmsjé Gauti sinnir nú tveimur hlutverkum – á kvöldin er hann Gauti Þeyr Másson rekstraraðili, en hann ásamt nokkrum öðrum heldur úti veislusal á Hallveigarstíg. Gauti segir hugmyndina ekki hafa verið sína upphaflega, en hann var fenginn með í dæmið af hinum, en þeir eru meðal annars umboðsmaður hans, bókari og aðrir sem hafa komið við sögu í tónlistarferli hans. En Gauti hatar vissulega ekki veislur.

„Ég elska veislur, mér finnst mjög gaman í veislum og hef alltaf verið mikill aðdáandi veisluhalds. Mér finnst ég knúinn til þess að gefa samfélaginu nýtt rými til að halda veislur í,“ segir Gauti kíminn og bætir við, „við erum ekki að opna skemmtistað – við erum að opna stað sem keyrir á bókunum. Salurinn tekur slatta í sæti og er tvær stærðir; stór salur og lítill inn af honum. Það eru líka alls konar möguleikar – Airwaves var haldið þarna þegar þetta hét Lídó, þannig að þetta er ekki einungis fyrir hlaðborð og veislur, það er alveg hægt að halda tónleika þarna til dæmis – það er hægt að hafa samband við okkur í gegnum tölvupóst og skoða það.“

Aðspurður hvort tónleikahald og annað sé planað í salnum segir hann að slíkt sé ekki komið á dagskrá enda séu þeir mest að einbeita sér að jólahlaðborðunum um þessar mundir en þegar þeim ljúki megi skoða það.

Hvernig hefur svo gengið hjá ykkur? 

„Við höfum verið með nokkra viðburði – við höfum verið að keyra á jólahlaðborðum núna í desember í samvinnu við Ostabúðina. Það hefur gengið mjög vel og það var gott sem uppselt áður en við fórum að auglýsa. Við vorum til að mynda með WOW Air síðustu helgi á hlaðborði – ég ætla að viðurkenna það að ég var drullustressaður. Þó að sumir okkar hafi verið í alls konar rekstri áður þá höfum við aldrei haldið jólahlaðborð. Þetta var svolítið krefjandi – ég var búinn að búast við að það myndi myndast svarthol og allir sogast ofan í það, því að ég var svo stressaður, en svo gekk þetta bara ótrúlega vel.“

Ert þú þarna með tuskuna og að þjóna til borðs og svona? 

„Upphaflega í WOW partíinu ætlaði ég bara að mæta og rappa en af því að ég var búinn að gæla við þetta verkefni í svolítinn tíma þá auðvitað þykir manni vænt um það, þannig að það liðu svona tíu mínútur af kvöldinu og þá var ég kominn í svuntu að taka diska og glös. Það er auðvitað ekkert að því, ég hef unnið sem þjónn og barþjónn í mörg ár – en það er eitthvað furðulegt við að taka disk af einhverjum og segja „má ég bjóða þér meira vín í glasið?“ og að vera svo kominn upp á svið örstuttu síðar að öskra „hvað segið þið gott, motherfuckers!? Er ekki allir í stuuuði?“

Mér leið eins og algjörum „boss“ þegar ég var uppi á sviði – horfði yfir konungsríki mitt en svo eftir smá stund var ég kominn á hnén að laga klósett sem einhver hafði stíflað, þetta var frekar furðulegt.“