Anna Wintour og Gwyneth Paltrow búa til tímarit saman

Útgáfurisinn Condé Nast, sem meðal annars gefur út Glamour, hefur hafið samstarf við Gwyneth Paltrow og ætlar að gefa út tímarit á prenti sem verður samhliða vefsíðu hennar GOOP. 

Það er sjálf Anna Wintour, ritstjóri bandaríska Vogue, sem kemur að þessu verkefni en þær Paltrow er vel til vina og hugmyndina að tímaritinu kviknaði í samtali þeirra tveggja.  Tímaritið mun koma út fjórum sinnum á ári á prenti og fyrsta tölublaðið lítur dagsins ljós í september á þessu ári. 

GOOP vefurinn, eða vefsamfélagið eins og það er kallað, var stofnaður af Paltrow árið 2008 og einblínir á heilsu og mat. Condé Nast hætti í fyrra útgáfu á tímaritinu SELF, sem einmitt fjallaði um heilsutengd málefni og á GOOP að fylla í það skarð.