Alhvítur kálfur í Fjölskyldu- og húsdýragarðinum

Nautkálfurinn Rjómi leit dagsins ljós í Fjölskyldu- og húsdýragarðinum síðastliðið miðvikudagskvöld. Rjómi, sem er alhvítur að lit, er undan alhvítu kúnni Hvítu Gautu sem dags daglega gengur undir nafninu Sulta. Auk þeirra Sultu og Rjóma eiga heima í fjósinu í Laugardalnum kýrnar Birna og Rifa og nautkálfarnir Brandur og Bolti.

Allt kemur þetta fram í fréttatilkynningu frá Fjölskyldu- og húsdýragarðinum en þar kemur fram að stutt sé á milli stórviðburða þar á bæ því geitaburði er nýlokið og senn má búast við að sauðburður hefjist.