Gengi breska pundsins fjárfestum hagstætt

Raungengi breska pundsins er mjög hagstætt í sögulegu samhengi og hefur lækkun þess undanfarið skapað mikil tækifæri fyrir þá sem hafa hug á því að fjárfesta í Bretlandi, að mati Gísla Haukssonar, stjórnarformanns og forstjóra GAMMA í Lundúnum.

Hann fjallaði um fjárfestingar­umhverfið í Bretlandi á morgunverðarfundi sem GAMMA stóð fyrir í lok síðasta mánaðar, en fyrir­tækið opnaði skrifstofu í höfuð­borg landsins fyrir um tveimur árum.

Gísli benti á að töluverður verðmunur væri á Íslandi og Bretlandi, sem skýrðist af því að íslenska krónan væri sterk um þessar mundir á meðan breska pundið væri veikt. Hann rifjaði upp að fyrir þjóðaratkvæðagreiðsluna í fyrra, þegar meirihluti Breta kaus að segja skilið við Evrópusambandið, hefði breska pundið þegar verið í sögulegu lágmarki, en síðan lækkað um önnur 18 prósent að kosningum loknum.

Margir hefðu auk þess búist við fasteignahruni í kjölfar atkvæðagreiðslunnar en sú hefði ekki orðið raunin. Þvert á móti hefði fasteignaverð hækkað töluvert, sér í lagi í Lundúnum þar sem nýbyggingar mættu ekki enn húsnæðisþörf. Þá hefði hagvöxtur verið meiri í landinu en á evrusvæðinu og atvinnuleysi minnkað hraðar. Þá benti hann á að Englandsbanki hefði haldið vöxtum í landinu lágum, eða um eitt prósent, frá hruni í þeim tilgangi að örva hagkerfið.

„Við erum svo upptekin af því að það hafi orðið hrun á Íslandi að við gleymum því að það varð hrun út um allan heim,“ sagði hann.

Sjóðir í stýringu GAMMA hafa tekið þátt í ýmsum fasteignaverkefnum í Bretlandi, svo sem byggingu íbúða, stúdentagarða og dvalarheimila, auk þess sem þeir hafa fjárfest í framleiðslu- og sölufyrirtækjum. 

Fréttin birtist fyrst í Markaðnum, fylgiriti Fréttablaðsins um viðskipti og fjármál.