Aðeins fjórðungur fyrirtækja undirbúinn fyrir gildistöku nýrra persónuverndarlaga

72 prósent aðildarfyrirtækja Samtaka iðnaðarins hafa ekki hafið undirbúning fyrir gildistöku nýrra persónuverndarlaga. Þetta kemur fram í nýrri könnun frá SI en þar segir einnig að 24 prósent fyrirtækja hafi lagt drög að innleiðingu laganna.

Niðurstöður könnunarinnar voru birtar í erindi Bjargar Ástu Þórðardóttur, lögfræðings SI, á fundi í morgun. Þar kemur einnig í ljós að þau ákvæði reglugerðarinnar sem valda fyrirtækjum mestum áhyggjum eru ákvæði sem lúta að réttindum einstaklinga um að gleymast og þeim rétti að að fá afhent gögn.

Í nýrri reglugerð þurfa fyrirtæki að vera með verkferla sem tryggja að hægt sé að verða við beiðnum einstaklinga með skilvirkum hætti. Tímaskortur virðist vera stærsta hindrun fyrirtækjanna við innleiðinguna en lögin taka gildi í maí næstkomandi. 

Jafnframt var spurt hvaða áhrif það hefði á aðildarfyrirtækin ef kæmi til álagningar hámarksfjárhæðar stjórnsýslusektar samkvæmt nýju reglugerðinni sem getur numið allt að 4 prósent ársveltu samsteypu og að hámarki 20 milljóna evra (tæplega 2,5 milljarðar króna um það bil).

Þar sögðu 15 prósent að fyrirtækið hefði tök á að greiða sektina, 17 prósent að fyrirtækið þyrfti að taka lán og 35 prósent sögðu að sektin myndi stefna fyrirtækinu í þrot.

Hér má lesa um ný persónuverndarlög sem taka gildi í maí 2018.

Hægt er að nálgast útsendingu fundarins hér, ásamt glærum framsögumanna.