Ætla að selja Lykil

Klakki ehf., eigandi Lykils fjármögnunar hf., hefur ákveðið að hefja opið söluferli á félaginu. Stefnt er að því að nýir eigendur taki við félaginu á vormánuðum 2018. Þetta kemur fram í tilkynningu. Þar kemur einnig fram að norræni fjárfestingarbankinn Beringer Finance hafi umsjón með söluferlinu en bankinn varð hlutskarpastur í valferli Klakka sem fram fór fyrr á þessu ári.

„Lykill er sterkt og öflugt félag sem starfar á sviði eignafjármögnunar og fjármagnar bíla- og tækjakaup. Félagið, sem starfar undir starfsleyfi sem fjármálafyrirtæki, var stofnað árið 1986 og hefur verið leiðandi á sínu sviði hér á landi. Höfuðstöðvar fyrirtækisins eru í Ármúla 1,“ segir í tilkynningunni.

Klakki er eignarhaldsfélag í eigu innlendra og erlendra fjárfesta. Lykill er í dag langstærsta eign Klakka en flestar aðrar eignir félagsins, s.s. VÍS og Skipti, hafa verið seldar á síðustu árum.