Jólin

Jólabrauðterta með hamborgarhrygg

Elín Albertsdóttir skrifar
Glæsileg jólabrauðterta sem Guðrún útbjó úr jólaafgöngum.
Glæsileg jólabrauðterta sem Guðrún útbjó úr jólaafgöngum. MYND/EYÞÓR

Guðrún rekur smurbrauðsstofuna Sylvíu á Laugavegi en hún tók við rekstrinum af tengdamóður sinni. Stofan er veisluþjónusta og Guðrún segir að mjög mikið sé að gera á aðventunni. „Við erum með fjölda fastra viðskiptavina á aðventu og sérstaklega á Þorláksmessu. Það er hefð í mörgum fyrirtækjum að bjóða upp á smurt brauð eða tapassnittur á þeim degi,“ segir hún.

Guðrún Pétursdóttir matreiðslumeistari. MYND/EYÞÓR

Guðrún samþykkti að útbúa jólabrauðtertu fyrir lesendur og hún segist strax hafa hugsað að hafa hana einfalda og með einhverju sem fólk ætti í ísskápnum. 

„Það eru flestir með afganga af hamborgarhrygg sem sniðugt er að nýta í brauðtertu. Það gæti verið kjörin leið til að koma í veg fyrir matarsóun að setja afganga í svona brauðtertu. Ég bjó til tertuna í fyrsta skipti um daginn og gaf nokkrum félögum mínum í kokkastétt að smakka. Þeir voru mjög hrifnir svo ég fór alla leið í þessu,“ segir Guðrún sem útskrifaðist sem matreiðslumaður árið 2013 og hélt þá áfram í meistaraskólanum. Hún lærði í veitingahúsi Perlunnar en fyrir tveimur árum tók hún við smurbrauðsstofunni.

Tertan er fallega skreytt en Guðrún segist vera mikið jólabarn sjálf. 

„Ég er eins og aðrir með ham­borgar­hrygg á aðfangadag. Í eftirrétt geri ég ís eða súkkulaðimús eftir því sem börnin vilja. Mér finnst gaman að skreyta í kringum mig og lýsa upp skammdegið. Ég byrja snemma að skreyta vegna þess að það er svo mikið að gera þegar líður að jólum í vinnunni,“ segir hún og hér kemur uppskriftin að þessari glæsilegu tertu.


Jólabrauðterta

  • Salat
  • 250 g hamborgarhryggur
  • 1 grænt epli
  • 10 vínber
  • 80 g niðursoðin ferskja
  • 50 g agúrka
  • 250 g majónes, má nota sýrðan rjóma á móti
  • 3 sneiðar brauðtertubrauð
  • Kryddað með salti, pipar og papriku eftir smekk

Allt hráefnið er saxað smátt, sett í skál og blandað saman. Best er að setja salatið í tertuna deginum áður, þá verður hún mýkri. 

Skreyting

Smyrjið tertuna með þunnu lagi af majónesi. Skerið agúrku í sneiðar og klæðið tertuna. Raðið skrauti ofan á og setjið steinselju í kanta.

Í skraut nota ég yfirleitt það sem fer í salatið eða bara það sem er til.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.



Velkomin á Vísi. Þessi vefur notar vafrakökur. Sjá nánar.