Gjafmildar Gullrillur

Okkur langaði að gera eitthvað skemmtilegt. Hér á Ísafirði er mikil skíðamenning og þess vegna kom þessi hugmynd upp. Við ákváðum að hafa fjáröflun, búa til sushi og selja, þar sem enginn sushistaður er á Ísafirði og alla langar í sushi. Þannig að við seldum vel og fyrir ágóðann keyptum við sem sagt gönguskíði sem við gáfum Tanga,“ segir Ásgerður Þorleifsdóttir, ein úr hópi kvenna á Ísafirði sem kalla sig Gullrillurnar.

Tangi er annar tveggja leikskóla á Ísafirði, hann er fyrir fimm ára börn, eða þau elstu á leikskólaaldri. „Skíðin verða notuð við útikennslu og í vali barnanna,“ segir Ásgerður. Hún segir Gullrillurnar koma úr ólíkum áttum. „Við kynntumst í kjölfarið á jafnréttisráðstefnu um árið og vorum allar svo uppveðraðar eftir þá ráðstefnu að við ákváðum að gera eitthvað skemmtilegt saman í kjölfarið. Við höfum sett okkur ýmis markmið í gegnum tíðina og brallað margt.“

Ásgerður segir það kost að búa í litlu samfélagi. „Bobbi í Kraftsport sem er með umboðið fyrir þessa skíðategund fékk gott tilboð frá skíðaframleiðandanum úti, svo þegar við fórum að sækja skíðin þá var forstöðumaður skíðasambandsins á Ísafirði í versluninni og hann stökk af stað og gerði skíðabraut í hvelli. Svo kom Gústi ljósmyndari og tók myndir og vídeó þannig að þetta small allt skemmtilega saman.“

Krakkarnir á Tanga voru mjög ánægð og spennt yfir gjöfinni að sögn Ásgerðar, en gjöfin er liður í að stuðla að gönguskíðamenningu á staðnum. „Ísafjörður er algjör gönguskíðaparadís, það er alltaf hægt að komast á gönguskíðasvæðið hér eftir að það fer að snjóa, þar er alltaf opið.“

Verkefninu er ekki hér með lokið enda segir Ásgerður frábært ef hægt væri að gefa leikskólum í nærliggjandi bæjum líka gönguskíði. „Fleiri fyrirtæki vilja taka þátt með okkur og hafa lýst yfir vilja til að kaupa fleiri skíði. Við erum búnar að fá styrk til að gefa leikskólanum á Flateyri næst, svo eru Þingeyri og Suðureyri eftir.“

Ásgerður bendir að lokum á að ef einhver vilji vera með í að styrkja verkefnið sé hægt að hafa samband við Gullrillurnar á síðu þeirra á Facebook.