Svíkja fé út úr fólki með fölskum fyrirmælum

Nokkuð hefur borið á því undanfarna daga að svikahrappar sendi út fölsk fyrirmæli á tölvupóst starfsfólks fyrirtækja um að millifæra fé á erlenda bankareikninga. Landsbankinn greindi frá þessu á vefsíðu sinni.

Svikatilraunirnar lýsa sér þannig að tölvupóstur sem virðist við fyrstu sýn vera frá framkvæmdastjóra fyrirtækis, en er í raun frá fjársvikurum, er sendur á fjármálastjóra eða annan sem sér um fjármál og greiðslur hjá fyrirtækjum. Í póstinum er spurt hvort tiltekin fjárhæð sé til reiðu á bankareikningi og í kjölfarið er óskað eftir að hún millifærð á erlendan reikning.

Um er að ræða svokallaðar fyrirmælafalsanir og hafa þær færst í aukana á síðustu árum.

Í tilkynningu frá Landsbankanum segir að mikilvægt sé að tilkynna glæpi af þessu tagi sem allra fyrst. „Ef grunur leikur á að fyrirtæki hafi orðið fyrir svona árás er mikilvægt að fyrirtæki hafi samband við lögregluna (cybercrime@lrh.is) og sinn viðskiptabanka. Bankinn setur af stað ferli í samstarfi við yfirvöld og aðra banka til að endurheimta féð. Því fyrr sem tilkynning berst, þeim mun líklegri eru endurheimtur. Ennfremur er mikilvægt að kæra öll mál til lögreglunnar. Sjaldnast er ráðist á eitt fyrirtæki í einu og það gerir tilkynningar til lögreglu enn brýnni.“