Nýjar útsetningar – á eldri tónlist

Tilefnið er bara að halda tónleika í skammdeginu, ekki endilega með jólatónlist heldur annarri hátíðlegri og þægilegri tónlist,“ segir Vigdís Klara Aradóttir, einn félaga í Íslenska saxófónkvartettinum sem spilar annað kvöld í Fríkirkjunni í Hafnarfirði. „Við spilum mest barokk- og renaissance-tónlist og akkúrat núna ætlum við að flytja í fyrsta skipti nokkur verk eftir Henry Purcell, sem einn úr okkar hópi, Peter Tompkins, hefur útsett sérstaklega fyrir okkur. Purcell er enskt tónskáld og Tompkins hefur mikinn áhuga á að koma tónlistinni hans inn á borð til okkar,“ segir Vigdís Klara glettin. „Svo erum við líka að spila í fyrsta skipti á saxófóna útsetningar Sigurðar I. Snorrasonar á þekktum íslenskum sönglögum og svo þjóðlega dansa frá Ungverjalandi.“ Tónleikarnir hefjast klukkan 20. Þeir verða án hlés og taka um klukkustund. Aðgangur er ókeypis og eru þeir styrktir af Hafnarfjarðarbæ. – gun