Almar ráðinn framkvæmdastjóri Krítar fjármögnunarlausna

Almar Guðmundsson, hagfræðingur og MBA, hefur verið ráðinn framkvæmdastjóri Krítar fjármögnunarlausna og mun hann stýra uppbyggingu félagsins. Þetta kemur fram í tilkynningu félagsins.

Fyrirtækið er nýtt og sérhæfir sig í fjármögnun á vörum í innflutningi. Krít rekur þjónustu sína í samstarfi við Eimskip og fjármagnar kaup á vörum sem viðskiptavinir Eimskips flytja og/eða hýsa í vörugeymslum félagsins. Krít er fjármagnað af sjóði sem rekinn er af GAMMA Capital Management.

Krít býður nýjung á íslenskum markaði þar sem tæknileg lausn tvinnar saman fjármögnun og flutning á þægilegan og einfaldan máta fyrir inn- og útflutningsfyrirtæki. Félagið er nýr valkostur fyrir fyrirtæki sem þurfa einfalda og þægilega birgðafjármögnun.

Almar gegndi síðast stöðu framkvæmdastjóra Samtaka iðnaðarins en var sagt upp störfum fyrr á árinu.