Er sjálf farfugl sem fer milli heimshluta

Fuglar er fyndin og fræðandi fjölskyldubók. Hún er eiginlega mannlífssögur um fugla. Við sögu koma allir íslensku varpfuglarnir og það er sagt frá þeim á spaugilegan hátt, þó er ekki farið með fleipur.“ Þannig byrjar Rán Flygenring teiknari að lýsa bókinni Fuglar sem hún og Svarfdælingurinn Hjörleifur Hjartarson hafa skapað saman, hún myndirnar, hann textann.

„Hjörleifur var verkefnastjóri við Náttúrusetur á Húsabakka í Svarfaðardal í nokkur ár og setti þar meðal annars upp fuglasýningu, enda Húsabakki staðsettur í fuglafriðland. Náttúrusetrið og fuglasýningin urðu heimilislaus þegar sveitarfélagið seldi húsið fyrir fáum árum en mikið af efninu lifir í bókinni okkar. Sýningin var grunnurinn að henni – eggið sem við unguðum út.

Þar er sagt frá því hvar fuglarnir lifa, hátterni þeirra lýst almennt en líka fjallað um hvar þeir koma fyrir í þjóðsögum og hindurvitnum. Svo eru uppskriftir og allskonar litlar sögur. Skemmtileg lesning fyrir fólk á öllum aldri.“

Rán segir teikningar hennar gerðar með það í huga að draga fram einkenni hvers fugls og ýkja þau í stað þess að vera mjög fræðileg. „Þarna er stelkurinn með sínar rauðu og rosalöngu lappir og brandöndin sem finnur sér drasl og dót til að verpa undir,“ nefnir hún sem dæmi.

Hún segir bókina Fugla í meðalstóru broti en þó þannig að hægt sé að fara með hana í ferðalög. „Hún er mjúk og opnast almennilega og maður getur hæglega tekið hana með sér í fuglaskoðunarleiðangra.“

Sjálf kveðst Rán vera farfugl sem fer á óskipulögðum tímum milli heimshluta. Maðurinn hennar er kvikmyndatökumaðurinn Sebastian Ziegler, sá sem tók myndina Vopnafjörður sem var frumsýnd nýlega og þau eiga soninn Felix sem er tíu mánaða.

„Ég hef verið á flakki í nokkur ár, fyrst með eiginmanninum og nú þeim feðgum. Er akkúrat núna á landinu en á leiðinn aftur út um helgina og er svolítið fram og til baka og hér og þar. Vinnan leyfir mér það. Ég get teiknað hvar sem er, þess vegna í flugvélum. Ég held að Fuglabókin hafi verið teiknuð í fjórum löndum.“

Núna er Rán að fara til Frakklands. „Við búum nokkra mánuði í senn í hverju landi og erum svo reglulega hér heima á milli.“