Tætum og tryllum og týrólateknó

Daddi Guðbergsson eða Daddi Disco ætlar að fara með hóp fólks í „Après-ski“ gleðiferð til bæjarins Madonna di Campiglio, en það er skíðaferð með áherslu á eftirskíðastemminguna. Daddi ætti að þekkja stemminguna vel – enda hefur hann ekki bara skíðað um alla Evrópu heldur skellt sér níu sinnum til Madonna Di Campiglio.

„Eftirskíðastemmingin er eitthvað sem kannski hefur aldrei tíðkast á Íslandi en er stór hluti upplifunarinnar í skíðaferðum í Evrópu. Þegar maður fer að skila sér úr fjallinu þá eru ákveðnir barir sem kallaðir eru „Après-ski“ barir og bjóða upp á ákveðna drykki – Jägerbomb, kakó með rommi og hitt og þetta. Þar ómar týrólateknóið alveg hreint.“

Konungur týrólateknósins er auðvitað sjálfur DJ Ötzi en tónlist hans er nánast sérstaklega gerð fyrir þessar aðstæður.

„Fólk er búið að renna sér í heilan dag, rjótt í kinnum og alveg í frábæru skapi – þá myndast svo skemmtileg stemming. Fólk er bara í skíðaklossunum náttúrulega. Það er ekkert sóðalegt eða ósiðlegt við þetta, bara fólk að gera sér glaðan dag. Fólk dettur í gírinn upp úr fjögur og klukkan svona sjö fer að dofna yfir þessu. Allir fara heim á hótel og snemma að sofa. Þetta er hið fullkomna síðdegi eftir krefjandi dag í fjallinu.“

Hvernig mun þín íslenska útgáfa af þessari stemmingu vera? 

„Það sem gerist þegar Íslendingar koma saman á erlendri grund er að það er grunnt á því að vilja fá að heyra sitt uppáhalds frá Íslandi. Við ætlum kannski ekki bara að spila íslenska tónlist – en það verður kannski aðeins minna af DJ Ötzi og meira af íslenskri púkamúsík. Ég spila auðvitað bara þá tónlist sem kemur Íslendingum og öðrum í gírinn og lauma þá inn einu og einu íslensku – það er allt í lagi að skoða það hvað gerist þegar Sódóma er tekin og allir í skíðaklossunum. Þarna gæti orðið eitthvert nýtt trend, Tætum og tryllum gæti orðið órjúfanlegur hluti af stemmingunni í fjöllunum í Týról.“

Sérstök upphitun verður haldin á morgun á Nora Magasín við Austurvöll.

„Fólk þarf að undirbúa sig andlega og láta eins og það sé að koma rautt í kinnum og uppfullt af súrefni beint úr fjallinu. Þarna verður boðið upp á Apérol Sprits – sem sumir tengja við sól og sumar en núna tengist það sól og vetri sterkum böndum og er vinsælasti drykkurinn í fjallinu. Síðan er það tónlistin sem ræður ríkjum og við spilum okkar útgáfu af týrólapartíinu. Þeir sem hafa upplifað „Aprés-ski“ stemmingu verða ekki sviknir.“