Gaman að finna gersemar

Fjölskyldan mín ákvað eiginlega að ég yrði listakona strax þegar ég var á unga aldri þar sem ég gerði lítið annað en að teikna. Það var engin pressa því ég kann hvort eð er ekkert annað. Nema kannski að elda,“ segir Védís Fríða Óskarsdóttir. Hún er á öðru ári í sjónlistadeild við Myndlistaskólann í Reykjavík. Samhliða náminu vinnur hún á sambýli hjá Reykjavíkurborg.

Spáir þú mikið í tísku? Ég get verið föst í tölvunni tímunum saman á meðan tískuvikan í New York stendur yfir, en spái lítið í hvað er í tísku þegar ég kaupi föt á sjálfa mig.

Hvernig myndir þú lýsa þínum stíl? Ég myndi lýsa honum sem mjög óreglulegum.

Hvar kaupir þú helst fötin þín? Ég versla aðallega hjá Rauða krossinum og Hjálpræðishernum en svo rata ég einnig oft inn á skemmtilega markaði og í leyndar nytjabúðir.

Áttu þér uppáhaldsfataverslun? Það er svo ógurlega mikið til af fötum í heiminum að ég kaupi eiginlega bara notuð föt. Mér finnst sérstaklega gaman að fara á fatamarkaðinn við Hlemm, þar leynast helstu gersemarnar.

Hvaða föt eru í mestu uppáhaldi hjá þér? Föt sem er erfitt að greina hvort manni finnst vera hryllingur eða tærasta snilld. Svo er efnið auðvitað eitt það mikilvægasta að mínu mati.

Hvaða flík hefur þú átt lengst og notar enn þá? Það mun vera fölbleika Spaksmannsspjaraskyrtan mín sem ég keypti á 100 kall í Kolaportinu fyrir um það bil 10 árum. Ég hef notað hana rosalega mikið í gegnum tíðina, enda sést það vel á henni.

Uppáhaldshönnuður? Alessandro Michele, yfirhönnuðurinn hjá Gucci, er búinn að gera magnaða hluti upp á síðkastið.

Notar þú fylgihluti? Ég á mjög mikið af skartgripum en nota þá örsjaldan, set þá kannski á mig og ríf þá af mér áður en klukkutími er liðinn. Ég kaupi samt alltaf meira af skartgripum þrátt fyrir að vera hundrað prósent meðvituð um þessa hegðun.

Áttu þér tískufyrirmynd? Já, flest allar úr sjónvarsþáttum og bíómyndum frá 10. áratugnum. Buffy og Willow úr Buffy the Vampire Slayer og Cher úr Clueless myndu líklega þó teljast sem uppáhalds.

Bestu og verstu fatakaupin? Bestu fatakaupin mín eru klossalegir pönkaraskór sem ég keypti á fatamarkaði háskólanema og passa við allt! Verstu kaupin eru goth tútúpils sem ég keypti í 8. bekk sem mér fannst ógurlega nett og kostaði 5.000 krónur sem var heilmikill peningur á þeim tíma, og svo að sjálfsögðu notaði ég það aldrei.

Er eitthvert tímabil sem þú tengir sérstaklega við í tískunni? Já, aðallega 70’s og 90’s.

Finnst þér gaman að klæða þig upp á? Aðeins of gaman stundum en ég má ekki hafa samt of mikinn tíma til að hafa mig til, þá fer allt til fjandans.