Tjöruhúsið, Vogafjós og Nordic meðal „svölustu veitingastaða Skandinavíu“

Blaðamaður New York Post kolféll fyrir veitingastöðunum Tjöruhúsinu, Nordic Restaurant og Vogafjósi þegar hann ferðaðist um landið fyrr í sumar. Íslandsförin var liður í ferð blaðamannsins um Noreg, Finnland og Ísland þar sem hann reyndi að kortleggja „svölustu veitingastaði í Skandinavíu.“

Þó svo að Ísland sé tæknilega ekki í Skandinavíu og blaðamaðurinn hafi skautað framhjá Svíþjóð og Danmörku lét hann það ekki á sig fá heldur þræddi veitingastaði frá miðborg Oslóar til Vestfjarða og kynnti niðurstöðurnar í grein á New York Post í morgun.

Kýr og hraun

Þar segir að Vogafjós á Mývatni sé eins nálægt því og maður kemst að borða beint frá býli. Blaðamaðurinn fer fögrum orðum um umhverfið, jafnt hraunið sem kýrnar sem fylgjast má með frá matsalnum. Bestu réttirnir á matseðlinum sé heimagerður mozzarella, reykt lamb og lax, bleikja og heimabakað brauð.

Timburhúsin heilluðu

Nordic Restaurant á Seyðisfirði er líkt við vin í eyðimörk, verðlaun í lok erfiðs ferðalags. Aftur heillar umhverfið og nefnir blaðamaðurinn sérstaklega hina myndrænu kirkju bæjarins sem og fallegu, litríku timburhúsin. T-bone lambasteik, meistarlega samsett salat og sætkartöflu/graskers-gratín var það sem stal senunni að mati blaðamannsins

Einn huggulegasti staður landsins

Hann á vart orð yfir veitingastaðinn Tjöruhúsið á Ísafirði sem hann segir ekki einungis einn mest heillandi veitingastað landsins, heldur sé verðlagið einkar sanngjart. Gestir eigi að búast við stuttum matseðli sem takmarkist við veiði dagsins. Það ætti þó enginn að fara súr frá borði enda mun panna full af fiski og kartöflum og matarmikil fiskisúpa ylja öllum um hjartarætur.

Úttektina má nálgast í heild sinni hér.