Skáldað í eyðurnar

Hugmyndir kvikna ekki í tómarúmi, það er líka gaman að prófa að byggja ofan á vinnu annarra,“ segir Lóa Hjálmtýsdóttir, teiknari og myndasöguhöfundur, sem leiðbeinir börnum í myndasögugerð í Barnahellinum í Norræna húsinu í dag. Lóa hefur útbúið myndasögu með eyðum sem má fylla í og sést hér að ofan. „Ég teikna sögu en sleppi hluta af henni þannig að börnin þurfa að vinna inn í söguna og geta í eyðuna. Það lækkar þröskuldinn og er oft hvetjandi að koma ekki að hvítu blaði,“ segir Lóa.

„Ég er ánægð að geta loksins tekið þátt í Bókmenntahátíð, ég hef vanalega verið að túra með FM Belfast á þessum tíma ársins. En ekki í ár og ég stökk því á tækifærið,“ segir Lóa.

Sjálf fór Lóa á eftirminnilegt myndlistarnámskeið átta ára gömul. „Þetta námskeið var í gamla Myndlista- og handíðaskólanum. Þar gerði ég mína fyrstu myndasögu. Ég teiknaði epíska myndasögu um listasafn þar sem listaverkin vakna á nóttunni. Kannski ég ætti að senda Ben Stiller bréf og segja honum að það hafi ekki farið fram hjá mér að hann hafi leitað í myndasögu mína eftir innblæstri fyrir Night at the Museum. Söguþráðurinn er mjög svipaður,“ segir hún og bendir á að það sé ekki útilokað að epískar hugmyndir kvikni á námskeiðinu hjá henni í dag.