Orðbragðið brýtur í bága við reglur Facebook

Gamanmyndahátíð Flateyrar fer fram um helgina, dagana 31. ágúst – 3. september, en brösulega hefur gengið að auglýsa hátíðina. „Ég ætlaði að kaupa auglýsingu á Facebook fyrir hátíðina en svo fæ ég skilaboð um að Facebook vilji ekki samþykkja hana,“ segir Eyþór Jóvinsson, einn skipuleggjandi Gamanmyndahátíðar Flateyrar.

„Auglýsingin brýtur í bága við reglurnar þeirra. Í fyrstu gat ég með engu móti áttað mig á því hvernig væri verið að brjóta reglur svo ég sendi þeim póst. Ég fékk þá svör um að orðbragðið í auglýsingunni væri ekki hægt að birta á Facebook,“ segir Eyþór og tekur orðið „shit“ sem dæmi en ein kvikmyndin sem sýnd er á hátíðinni heitir Slavek the shit. Eyþór gerði tilraun til að tjónka við starfsfólk Facebook. „Þrátt fyrir nokkra tölvupósta fram og til baka féllst Facebook ekki á að leyfa auglýsinguna og þar við situr.

Þess má geta að á hátíðinni er lögð áhersla á íslenskar gamanmyndir, alls verða sýndar 23 íslenskar myndir í ár. Hátíðin fer að mestu fram í gömlum bræðslutanki sem stendur á Flateyri. „Það er væntanlega eina kringlótta kvikmyndahús heims,“ segir Eyþór.