Óttuðust að missa fólk og hækkuðu launin í Bláa lóninu

„Við fórum í launagreiningar á árinu 2015, í ljósi þróunar á vinnumarkaði, og tókum ákveðin skref í þá átt að skoða laun í okkar fyrirtæki og settum okkur það markmið að okkar starfsmenn þyrftu ekki að leita í önnur sambærileg störf á vinnumarkaði vegna þess að við værum ekki að greiða samkeppnishæf laun,“ segir Grímur Sæmundsen, forstjóri og stærsti eigandi Bláa lónsins, um þá staðreynd að launagreiðslur til starfsmanna fyrirtækisins, þegar búið er að taka tillit til fjölgunar í þeirra hópi, hækkuðu umtalsvert milli áranna 2015 og 2016.

Samkvæmt ársreikningi Bláa lónsins fyrir árið í fyrra námu launagreiðslur til 394 starfsmanna fyrirtækisins alls 19,6 milljónum evra. Það gerir að meðtaltali um 50 þúsund evrur á starfsmann í árslaun eða 6,7 milljónir króna miðað við meðalgengi evru árið 2016. Til samanburðar voru launin að meðaltali um 41 þúsund evrur á hvern starfsmann árið áður. Um 22 prósenta hækkun er því að ræða en á árinu 2016 hækkaði launavísitala á Íslandi um 11,4 prósent.

Hagnaður Bláa lónsins í fyrra eftir skatta nam 23,5 milljónum evra, eða um 2,6 milljörðum íslenskra króna, og jókst um nærri 50 prósent á milli ára.

„Þetta var ákveðið átaksverkefni á sínum tíma og við finnum ekki annað en að við höfum náð að halda sjó er varðar laun. Okkur hefur gengið mjög vel að halda í fólk og það hefur verið eftirspurn eftir störfum hjá okkur þrátt fyrir þessa þenslu sem er á vinnumarkaðnum. Við höfum því ekki lent í neinum erfiðleikum með að fá fólk til starfa,“ segir Grímur. 

Fréttin birtist fyrst í Markaðnum, fylgiriti Fréttablaðsins um viðskipti og efnahagsmál.