VÍS hagnast um 1,1 milljarð

Tryggingafélagið VÍS hagnaðist um 1.107 milljónir króna á fyrri helming ársins 2017, samanborið við 238 milljónir króna á sama tímabili árið 2016. Hagnaður á hlut nam 0,50 krónum samanborið við 0,10 krónur fyrir sama tímabil árið 2016.

Fram kemur í tilkynningu frá félaginu að bókfærð iðgjöld jukust um 16,7 prósent frá sama tíma í fyrra. Kostnaðarhlutfall lækkaði í 20,8 prósent úr 22 prósent á sama tíma í fyrra.

Samsett hlutfall var 95,4 prósent en var 104,8 prósent á sama tímabili í fyrra. Tekjur af fjárfestingastarfsemi námu 1.152 milljónum króna, samanborið við 636 milljónir króna á sama tíma 2016.

 „Annar ársfjórðungur var félaginu hagfelldur. Samsett hlutfall var 84,2% sem er með því lægsta sem við höfum séð um langt árabil og var afkoma viðunandi af flestum vátryggingagreinum á tímabilinu.  Sá iðgjaldavöxtur sem við höfum séð síðustu misseri heldur áfram og er þar bæði um að ræða hærri meðaliðgjöld, en einnig ný viðskipti.  Þannig eru eigin iðgjöld að vaxa um 15,6% frá sama tímabili í fyrra.  Félagið hefur frá árinu 2015 unnið að breytingum á iðgjöldum til að bregðast við mikilli hækkun í tíðni tjóna og tjónakostnaðar. Því er niðurstaða fjórðungsins gleðiefni og vonast er til að farið sé að draga úr þeirri miklu hækkun tjónakostnaðar,“ segir Helgi Bjarnason forstjóri VÍS í tilkynningu.