Besti tími Íslendings í Reykjavíkurmaraþoninu frá upphafi

Arnar Pétursson er Íslandsmeistari í maraþonhlaupi eftir sigur í Reykjavíkurmaraþoni Íslandsbanka sem fram fór í morgun.

Arnar kom í mark á 2:28:17 klst. Tími hans er besti tími sem Íslendingur hefur náð í Reykjavíkurmaraþoninu og einnig persónulegt met hjá Arnari. Áður átti Sigurður Pétur Sigmundsson besta tíma Íslendinga.

Íslandsmetið í maraþonhlaupi á hins vegar Kári Steinn Karlsson frá því árið 2011 þegar hann hljóp kílómetrana 42 á 2:17:12 klst í Berlín. 

Í öðru sæti í hlaupinu í dag varð Svíinn Patrik Eklund og í því þriðja Blake Jorgensen frá Bandaríkjunum.

Í öðru sæti í Íslandsmeistaramótinu var Sigurjón Ernir Sturluson á tímanum 2.50:21 klst og í því þriðja Páll Ingi Jóhannesson á tímanum 2:57:00 klst.

Ásta Kristín R Parker er Íslandsmeistari kvenna. Hún kom í mark á 3:11:07 klst. Í öðru sæti í Íslandsmeistaramóti kvenna var Anna Guðrún Gunnlaugsdóttir og í því þriðja Fjóla Dröfn Guðmundsdóttir.

Hin kanadíska Natasha Yaremczuk var hins vegar fyrst kvenna í mark á tímanum 2:53:25 klst. Amanda Watters frá Bandaríkjunum varð önnur og Laura Couvrette frá Kanada varð þriðja.

Elín Edda og Hlynur fyrst

Einnig var keppt í hálfu maraþoni og 10km hlaupi í dag. Hlynur Andrésson kom fyrstur í mark í hálfu maraþoni á tímanum 1:09:08. Kanadamaðurinn James Finlayson var í öðru sæti og Bandaríkjamaðurinn Christopher Mahone í því þriðja.

Kvennamegin var Elín Edda Sigurðardóttir fljótust allra og hljóp á 1:21:25 klst. Þær Janna Mitsos og Heather Mahoney frá Bandaríkjunum voru í öðru og þriðja sæti.

Í 10km hlaupi var Baldvin Þór Magnússon fyrstur í mark á 32:50 mín. Joel Aubeso frá Spáni varð annar og Frakkinn Lenas Mathis þriðji. 

Belginn Nina Henriette J Lauwaert var hlutskörpust kvenna og hljóp á 34:43 mín. Kate Hulls frá Bretlandi varð önnur og í þriðja sæti, og jafnframt fyrst Íslendinga, var Guðlaug Edda Hannesdóttir sem hljóp á 36:08 mín. 

Alls voru skráðir 14228 manns til leiks í dag, þar af 1490 í maraþonhlaup, 2963 í hálft maraþon og 6747 í 10km.