Saka stjórnvöld um dýraníð

Samtökin Jarðarvinir saka stjórnvöld um dýraníð og hyggja á málarekstur. Þau vilja að griðartími hreindýrskálfa verði lengdur um einn mánuð og að hreindýraveiðum verði seinkað.

Hreindýraveiðar eru þegar hafnar þetta sumarið en fram til 1. ágúst má einungis fella tarfa. Eftir það má einnig skjóta kýr. Heildarstofninn á Íslandi telur um 6.000 dýr en veiðikvóti þessa árs telur 1.315 hreindýr. Þar af eru 922 kýr.

Samtökin Jarðarvinir segja of snemmt að hefja veiðar á kúm á þessum tíma þar sem kálfarnir séu ekki tilbúnir að skilja við mæður sínar. „Þær eignuðust kálfana sína um mánaðarmótin maí/júní, eða seint í maí, og kálfarnir eru rétt tveggja mánaða gamlir," segir Óli Anton Bieltvedt, kaupsýslumaður og talsmaður Jarðarvina. 

„Dýrin í eðli sínu þurfa á aðstoð, í fyrsta lagi mjólk, en aðstoð og vernd móður sinnar að halda í allt að eitt ár," segir Óli.

Hann leggur til að griðartími kálfa verði lengdur um einn mánuð og að veiðum á kúm verði seinkað þar til 1. september. Þannig fái kálfarnir auka mánuð á spena. Hann telur málið varða við nokkur ákvæði laga um dýravelferð og bendir meðal annars á að kýrnar séu skotnar fyrir framan kálfana. Óli hefur reynt að benda stjórnvöldum á málið en talað fyrir daufum eyrum.

„Við teljum að með þessu athæfi sé verið að brjóta þau lög í mörgum efnum, nokkrar greinar. Ég hef því beðið lögfræðing um að skoða þetta mál með það í huga að kæra eða stefna stjórnvöldum fyrir þetta athæfi sem ég tel að standist alls ekki," segir Óli.

Umhverfis- og auðlindaráðherra ákveður hreindýrakvóta að fengnum tillögum frá Umhverfisstofnun en hvorki náðist í ráðherra né forstjóra Umhverfisstofnunar vegna málsins í dag.