Gjaldtaka við Hraunfossa sett á ís

Ekki hefur verið ákveðið hvenær gjaldtaka við Hraunfossa í Hvítársíðu getur hafist. Kristín Linda Árnadóttir, forstjóri Umhverfisstofnunar, lýsir málinu í raun sem á ís.

„Það er ekkert að frétta af gjaldtöku þar,“ segir Kristín.

Framkvæmdaaðilar og landeigendur við Hraunfossa í Hvítársíðu ákváðu í byrjun mánaðarins að bíða með gjaldtöku við bílastæðið á svæðinu í nokkra daga eftir að Umhverfisstofnun sagði að gjaldtaka væri ekki heimili og sagði eigendur eiga yfir höfði sér allt að 500 þúsund króna sektir á dag.

Til stóð að hefja gjaldtökuna fyrsta júlí. „Við erum búin að segja þeim að það sé ekki heimild fyrir þá til að gera þetta. Höfum sent þeim bréf með afstöðu stofnunarinnar og fundað með þeim. Það hefur ekkert verið haft frekar samband við okkur,“ segir Kristín.

Styrk var úthlutað úr Framkvæmdasjóði ferðamannastaða til að stækka bílastæðið við Hraunfossa.

Samkvæmt tilkynningunni höfðu landeigendur ekki frumkvæði né vissu um beiðnina um styrkinn og „hefur hann ekki verið nýttur og verður ekki nýttur ef leyfi fæst til töku aðstöðugjaldsins“.