Toppnum líklega náð

Hægst hefur á vexti í nýtingu hótelherbergja á höfuðborgarsvæðinu. Hjá Icelandair hótelum var minna um bókanir með skömmum fyrirvara í júní og meira var um afbókanir hópa en á sama tíma í fyrra. Sterk staða krónunnar er líklega stór orsakavaldur.

Eftir gríðarlega fjölgun gistinátta á hótelum á síðasta ári og í byrjun þessa árs, eða 20 til 60%, hægði verulega á vextinum í maí og fór hann niður í 6,1% þrátt fyrir að ferðamönnum hafi fjölgað um 18% á sama tíma.

Greiningardeild Arion banka segir þessa framvindu vera að hluta til framhald af þróun sem hófst á síðasta ári þegar dvalartími ferðamanna tók að styttast þannig að gistinóttum fjölgaði hægar en ferðamönnum. Þá kunni einnig að vera að sterkt gengi krónunnar sé að leiða til þess að ferðamenn kjósi í auknum mæli ódýrari gistingu líkt og í tjöldum, heimahúsum, í húsbílum eða á gistiheimilum.

Í óformlegri könnun fréttastofu mátti til dæmis finna þó nokkurn fjölda tjalda og óhefðbundra gistikosta á bókunarsíðum, bæði í borginni og utan hennar.

Nýtingatölur eru þó almennt sterkar og í flestum landshlutum batnaði hún milli ára í maí. Stóra undantekningin er hins vegar höfuðborgarsvæðið, þar sem nýtingin fór úr 79,4% í 70,6%.

Almennar tölur fyrir júní hafa ekki verið birtar en í nýtingartölum Icelandair hótela má þó leita vísbendinga um þróunina.

Þar segir að herbergjanýting hafi verið 80% í júní samanborið við 84,5% á síðasta ári. Þá sagði í tilkynningu félagsins til Kauphallar að eftirspurn bókana með skömmum fyrirvara hafi verið minni en áætlað var ásamt því að meira hafi verið um afbókanir hópa en á sama tíma í fyrra.

Greiningardeild Arion banka segir þessar nýjustu tölur um gistinætur erlendra ferðamanna á hótelum, sem og ýmislegt, annað bera með sér að toppnum í vextinum sé að öllum líkindum náð.