Vill skattaafslátt vegna hlutabréfakaupa

„Ég held það sé skynsamlegt að vera með slíka skattalega hvata fyrir almenning til að taka þátt í atvinnulífinu,“ segir Óli Björn Kárason, formaður efnahags- og viðskiptanefndar Alþingis.

„Við höfum góða reynslu af því og ég held að þetta verði ekki bara til þess að auka sparnað almennings heldur ekki síður til þess að við sjáum hér öflugri hlutabréfamarkað,“ heldur Óli Björn áfram. Hann sér fyrir sér að leggja fram frumvarp um skattaafslátt vegna hlutabréfakaupa þegar þing kemur saman, taki ríkisstjórnin ekki af skarið.

Í gær sendu Samtök atvinnulífsins frá sér yfirlýsingu um að samtökin telji skynsamlegt að stjórnvöld hvetji almenning til þátttöku í atvinnurekstri með því að veita einstaklingum skattaafslátt vegna hlutabréfakaupa. Fyrir síðustu aldamót var um hríð hvatt til þátttöku almennings í atvinnulífinu með því að kaup á hlut í hlutafélögum, sem uppfylltu tiltekin skilyrði, veittu rétt til skattaafsláttar upp að ákveðnu marki.

Samtök atvinnulífsins benda á að hægt sé að horfa til Svíþjóðar sem fyrirmyndar í þessum málum. Óli Björn telur sænsku leiðina þó ekki endilega þá farsælustu. „Það er dálítið annað og hún er flóknari. Ég er ekki viss um að hún henti okkur en hún kemur auðvitað vel til greina.

Hin leiðin, sem er afsláttur þar sem þú getur dregið ákveðna fjárhæð vegna hlutabréfakaupa frá tekjuskattsstofni, eins og við þekkjum og var hér við lýði í mörg ár, er einföld og gegnsæ aðferð til að hvetja launafólk til að taka þátt í atvinnulífinu,“ segir Óli Björn.

Páll Harðarson, forstjóri Kauphallarinnar, telur bæði sænsku leiðina og þá sem áður var við lýði hér koma sterklega til athugunar. 

„Þetta eru ólíkar leiðir að sama marki. En ég myndi svo sannarlega styðja sænsku leiðina ef hún yrði farin.“

Katrín Jakobsdóttir, formaður Vinstri grænna, telur að skoða þyrfti skattaafslætti af þessu tagi vel áður en ráðist yrði í þá. „Mér finnst mjög mikilvægt að skattkerfið eigi að vera réttmætt og sanngjarnt. Það er ekki ólíklegt að skattaafsláttur vegna hlutabréfakaupa myndi fyrst og fremst nýtast þeim sem hafa efni á að kaupa hlutabréf. Mér finnst að slíkar skattaívilnanir þurfi að hafa tilgang, að stuðla að aukinni fjölbreytni í atvinnulífi, aukinni áherslu á þekkingariðnað eða eitthvað slíkt.“