Glöggt er gests augað

Áhugavert var að sjá greiningu Alþjóðagjaldeyrissjóðsins á íslenskum ferðamannaiðnaði. Sjóðurinn virðist einkum þakka íslensku ferðamannasprengjunni, eldgosinu í Eyjafjallajökli og þeirri miklu markaðssetningu sem fylgdi í kjölfarið. Síðan hafi komið til stórbættar flugsamgöngur en 28 flugfélög fljúga nú til landsins, og hefur fjöldi flugfélaga fjórfaldast á einungis örfáum árum.

Með öðrum orðum. Ísland er orðið mun þekktara en áður, auðvelt er að komast hingað og verð á flugi samkeppnishæft. Athyglisvert var einnig að sjóðurinn tiltekur öryggi ferðamanna sem einn styrkleika íslenskrar ferðaþjónustu. Þeim sem hingað rata finnst þeir öruggir og hryðjuverkaógnin í Evrópu virðist fjarlæg.

AGS telur þó að ákveðnar blikur séu á lofti. Þá allra helst styrkur krónunnar, en sjóðurinn segir að óumflýjanlegt sé að það hafi áhrif þegar gjaldmiðill styrkist jafn skarpt og krónan hefur gert. Blessunarlega telur AGS þó að ólíklegt sé að vöxtur undanfarinna ára gangi til baka, þótt vissulega muni um hægjast.

Samkvæmt því er ferðamannaiðnaðurinn kominn til að vera sem ein aðalútflutningsgrein þjóðarinnar. Sjóðurinn nefnir að helstu áhættuþættir í ferðaþjónustu séu styrjaldir, grotnandi innviðir, yfirtroðningur ferðamannastaða og versnandi samkeppnishæfni.

Ljóst er að hið síðastnefnda er raunveruleiki á Íslandi með yfirstyrkingu krónunnar. Framtíðarlausn í þeim efnum finnst varla nema með upptöku annars gjaldmiðils. Innviðir og yfirtroðningur ferðamannastaða er sömuleiðis eitthvað sem við ættum að vera vakandi yfir.

Ef súmmera á upp niðurstöðu sjóðsins í nokkrum orðum má segja að staðan sé að stærstum hluta öfundsverð. Hins vegar þurfum við að vera vakandi fyrir hættum og forðast að fljóta sofandi að feigðarósi.

Hér hefur mikið afrek unnist á undanförnum árum. Nú er tími til að taka næsta skref og verða þroskað ferðamannaland. Vert er að taka fullt tillit til athugasemda Alþjóðagjaldeyrissjóðsins á þeirri vegferð.

Stjórnarmaðurinn er sigldur innherji með puttann á púlsinum. Stjórnarmaðurinn skrifar í Markaðinn í Fréttablaðinu á miðvikudögum og liggur ekki á skoðunum sínum um menn og viðskiptaleg málefni.