Hagnaður Krónunnar jókst um 18 prósent og nam 843 millljónum

Hlutafélagið Festi, sem rekur meðal annars verslanir Krónunnar og Elko, skilaði rúmlega 2,1 milljarðs króna hagnaði á tímabilinu 1. mars 2016 til 28. febrúar 2017. Jókst hagnaður félagsins um 42 prósent á milli ára. Alls seldi félagið, sem er næst stærsta smásölufélag landsins, vörur fyrir 39,4 milljarða króna á tímabilinu, samanborið við 35,7 milljarða króna árið áður, og var framlegðin 20,4 prósent, samkvæmt nýbirtum ársreikningi félagsins.

Samkvæmt efnahagsreikningi félagsins námu eignir þess 39,3 milljörðum króna í lok febrúarmánaðar og var eiginfjárhlutfallið 38,6 prósent. Jukust eignirnar um 5,2 prósent á milli ára.

Hagnaður dótturfélagsins Krónunnar ehf., sem rekur verslanir um allt land undir merkjum Krónunnar og Kjarvals, nam 843 milljónum króna á tímabilinu og jókst um rúm átján prósent á milli ára. Matvörukeðjan seldi vörur fyrir 28 milljarða króna og jókst salan um sjö prósent frá síðasta rekstrarári. Var framlegðin um nítján prósent. Eignir Krónunnar jukust um tæp ellefu prósent á milli ára og námu um 5,3 milljörðum króna í lok febrúar.

Hagnaður raftækjaverslunarinnar Elko dróst nokkuð saman á síðasta ári. Verslunin hagnaðist um 533,7 milljónir á síðasta rekstrarári samanborið við 569 milljónir á rekstrartímabili þarsíðasta árs. Vörusalan jókst um 13,6 prósent á milli ára en á móti vógu meðal annars laun og launatengd gjöld, sem hækkuðu um sextán prósent, og annar rekstrarkostnaður. Framlegðin var 22,9 prósent á tímabilinu. Eignir verslunarinnar námu tæpum tveimur milljörðum í lok febrúarmánaðar og var eiginfjárhlutfallið þá 29 prósent.

Annað dótturfélag Festar, félagið ISP á Íslandi, sem rekur verslun Intersport á Bíldshöfða, tapaði 14,6 milljónum króna á síðasta rekstrarári. Eins og kunnugt er hafa stjórnendur Festar ákveðið að loka versluninni frá og með 31. júlí næstkomandi. Félagið tapaði 8,9 milljónum króna á þarsíðasta rekstrartímabili og jókst tapið því um tæpar sex milljónir á milli ára. Var bókfært eigið fé félagsins neikvætt um 24,2 milljónir króna í lok febrúar.

Þá rúmlega fjórfaldaðist hagnaður fasteignafélags Festar, Festi fasteignir ehf., á síðasta rekstrartímabili. Nam hann um einum milljarði króna á tímabilinu, en eignir félagsins voru um 15,2 milljarðar króna í lok febrúarmánaðar. Festi á sautján fasteignir sem eru annaðhvort í leigu hjá verslunum félagsins eða þriðja aðila. Heildarstærð fasteignanna er um 71.500 fermetrar.

Greint var frá því í síðasta mánuði að olíufélagið N1 hefði í hyggju að festa kaup á öllu hlutafé í Festi. Er heildarvirði Festar metið á 37,9 milljarða króna í viðskiptunum. Festi er í eigu SFV slhf. og eru hluthafar um þrjátíu talsins. Stærsti hluthafinn er framtakssjóðurinn SÍA II, í rekstri eigna­stýringarfélagsins Stefnis, en eftir umrædd kaup verður sjóðurinn fjórði stærsti hluthafi í N1 með rúmlega átta prósenta hlut. Lífeyris­sjóðir, ásamt Arion banka og VÍS, eru í hópi stærstu hluthafa sjóðsins.

Fréttin birtist fyrst í Markaðnum, fylgiriti Fréttablaðsins um viðskipti og efnahagsmál.