Ætlar að nýta kalda vatnið úr Vaðlaheiðargöngum

Norðurorka á Akureyri ætlar að byggja vatnsból í Vaðlaheiðargöngum og nýta köldu vatnsæðina sem opnaðist þar vorið 2015 og tafði gangagröft. Samkomulag um að Norðurorka leiði vatnið út úr göngunum verður undirritað á næstu vikum og mun fyrsti áfangi verkefnisins kosta fyrirtækið um 100 milljónir króna.

„Við viljum nýta þetta til samfélagsins við Eyjafjörð og ætlum að byggja vatnsból inni í fjallinu og safna þessu saman á öruggan hátt. Við erum búin að láta meta gæði vatnsins og um hversu mikið magn verður að ræða á endanum,“ segir Helgi Jóhannesson, forstjóri Norður­orku, í samtali við Fréttablaðið.

Um 70 lítrar af köldu neysluvatni munu að sögn Helga streyma úr lögnum fyrirtækisins í göngunum á hverri sekúndu þegar fyrsta áfanga verður lokið. Meðalnotkun á Akureyri er um 115 lítrar á sekúndu en í fyrsta áfanga verður vatninu beint til sjávar.

„Þetta er því stór hluti af meðalnotkuninni og þvílík auðæfi fyrir samfélagið til langs tíma. Það er búið að hanna þetta en síðan eigum við eftir að byggja upp tankaaðstöðu og tengja þetta við vatnsveitukerfi Akureyrar og Svalbarðsstrandar. Við erum ekki búin að verðmeta seinni áfangann en þetta tækifæri gefst einungis einu sinni, að koma vatninu út, og við ætlum okkur að nýta það. Við viljum skrifa undir sem fyrst enda ekki eftir neinu að bíða,“ segir Helgi.

Norðurorka hefur kannað hvort nýta megi vatnið síðan stór misgengissprunga opnaðist í göngunum Fnjóskadalsmegin í apríl 2015 og um 500 lítrar af köldu vatni fóru að streyma inn í þau á sekúndu. Fylltust göngin þá af vatni á löngum kafla á sama tíma og heitt vatn streymdi úr annarri stórri sprungu Eyjafjarðarmegin sem opnaðist í febrúar 2014. Verktakar í göngunum sprengdu síðasta haftið þar í apríl síðastliðnum.