Ný stikla fyrir Game of Thrones

Ný stikla fyrir nýjustu seríu Game of Thrones er farin í loftið og er óhætt að segja að aðdáendur mega eiga von á góðu.

Meðal þess sem fram kemur í stiklunni er Dyrhólaey, drekar, heljarinnar bardagar og setning frá Sönsu Stark, sem hefur fengið aðdáendur til að klóra sér í hausnum. „Stakir úlfar drepast en hópurinn lifir af.“

Hvað þýðir það? Það kemur í ljós í júlí.

Þá bregður fyrir heljarinnar bardaga þar sem sjá má Jon Snow og félaga ofan á ísilögðu bjargi. Er það úr hinum háleynilega bardaga sem tekinn var upp hér á landi og enginn veit hvað mun hafa í för með sér? 

Það verður að koma í ljós.

Þáttaröðin átti upphaflega að fara fyrr í loftið en dróst á langinn meðal annars vegna snjóleysis hér á Íslandi. Tafði það upptökur svo að frumsýningu var frestað.

Sjá einnig: Bakvið tjöldin við tökur á Game of Thrones: „Ísland eini staðurinn sem kemur til greina“

Tökuliðið var hér á ferð um miðjan janúar og fóru tökur meðal annars fram á Svínafellsjökli, í Reynisfjöru og við Jökulsárlón. Þetta var í fimmta skipti sem tökulið þáttanna kemur hingað til lands.

Þáttaröðin sjálf, sem verður sú næstsíðasta í röðinni, hefst 16. júlí næstkomandi. Þættirnir verða sýndir samtímis í fjölda landa, þar á meðal á Stöð 2 á Íslandi.