Þröngt mega sáttir improv leikarar sofa

Hópur frá Improv Ísland er nú staddur í New York borg til að sækja stærstu spunahátíð í heimi og vinnustofur henni tengdar. 

„Við erum nítján hérna í þriggja herbergja Airbnb-íbúð. Það gengur bara mjög vel – við erum búin að vera hérna alla vikuna og það er bara ógeðslega kósí. Það er svona rúm-við-rúm stemning. Ég var svolítið stressuð við tilhugsunina en þetta gengur bara eins og í sögu,“ segir Dóra Jóhannsdóttir spunaleikari, en nítján manna hópur úr Improv Íslandi er um þessar mundir staddur í New York á Del Close maraþoninu sem er stærsta spunahátíð í heimi. Þar eru þau með viðburði og mæta á námskeið og í vinnustofur. Allur hópurinn verður að láta sér það lynda að vera troðið í eina íbúð, en eins og Dóra segir virðist það bara ganga prýðilega.

„Við erum svo mörg að þetta skiptist aðeins niður – það eru djammararnir og skokkararnir sem fara út á morgnana, líka þeir sem eru að túristast og þannig. Við erum alveg nítján – þetta hópast niður eftir áhugasviðum þannig að það verða engir árekstar hérna.“

Nú eru þið öll leikarar – er ekkert verið að keppast um athyglina? „Nei, nei, við erum svo þrautþjálfaðir spunaleikarar, við erum alltaf að æfa okkur í að hlusta og spyrja, vera jákvæð og svona. Það nýtist heldur betur þegar maður er kominn í svona „extreme“ gisti-aðstæður.“

Þess má geta að sýning hópsins fór fram í gær á besta tíma á mjög góðu sviði og sama kvöld sýndi hin mjög svo fræga Amy Poehler en hún er goðsögn í improv heiminum.