HS Orka vill að Yrsa myrði einhvern hjá sér

HS Orka hefur ítrekað beðið glæpasagnahöfundinn og verkfræðinginn Yrsu Sigurðardóttur að „myrða einhvern“ í einhverju af orkuverum fyrirtækisins.

Þetta er meðal þess kom fram í þættinum The Arts Hour á BBC World Service sem sendi út frá Tjarnarbíó í Reykjavík.

Þar ræddi þáttastjórnandinn Nikki Bedi við fjölmarga íslenska listamenn, leikara, rithöfunda og tónlistarfólk um listsköpun á Íslandi. Reyndi hún að leita svara við því hvernig hin harðneskjulega veðrátta, dimmur vetur og langar sumarnætur hafi áhrif á störf listmanna á Íslandi.

Meðal viðmælenda Bedi voru þau Yrsa Sigurðardóttir, leikarinn Ólafur Darri Ólafsson og rithöfundurinn og forsetaframbjóðandinn Andri Snær Magnason. Þá ræddi hún einnig við grínistann Ara Eldjárn, Katrínu Kötu Mogensen í Mammút sem og Sölku Valsdóttur í Reykjavíkurdætrum.

Yrsa var spurð að því hvernig hún sækir innblástur fyrir glæpasögur í landi þar sem hrottaleg morð og ómanneskjuleg afbrot eru fátíð. Hún sagði að það reyndist henni oft erfitt en að galdurinn við góða glæpasögu væri þó að hafa hana, og þá sérstaklega einstaklingana, trúðverðuga og að auðvelt væri að tengja við þá.

Þá sagði hún einnig á léttu nótunum að HS Orka hafi oft farið þess á leit við hana að hún myndi taka sig til og „myrða einhvern“ í einu af orkuverum fyrirtækisins. Uppskar hún mikinn hlátur í salnum fyrir vikið. Yrsa á stóran aðdáendahóp um heim allan og hefur selt bækur sínar í bílförmum þannig að slíkur morðvettvangur væri því skiljanlega heljarinnar auglýsing fyrir fyrirtækið.

Þáttinn má nálgast innan tíðar á vef BBC.