Bláa lónið verður opið fram yfir miðnætti

Opnunartími Bláa lónsins hefur verið lengdur til hálf tólf á kvöldin og síðar í sumar verður opið til hálf eitt að nóttu. Þetta staðfestir Már Másson, yfirmaður markaðsmála hjá Bláa lóninu.

„Frá og með 26. maí og til júníloka er opið til hálf tólf á kvöldin og frá 30. júní til ágústloka verður opið frá sjö til hálf eitt að nóttu. Þá er selt ofan í lónið til klukkan ellefu á kvöldin en gestir þurfa að vera komnir upp úr klukkan hálf eitt,“ segir Már.

„Það er mikil eftirspurn hjá viðskiptavinum okkar og til dæmis erum við snemma á morgnana að koma til móts við fólk sem er að fljúga svo áfram og er einungis í stoppi fram yfir hádegi. Yfir hásumarið eru svo margir sem vilja nýta björt sumarkvöldin. Það er ekki sama verðlagningin yfir allan daginn og fer hún eftir eftirspurn á hverjum tíma.“

Fjöldi heimsókna í Bláa lónið fór í fyrra í fyrsta sinn yfir eina milljón, eins og kom fram Markaðnum, fylgiriti Fréttablaðsins um viðskipti og efnahagsmál, í gær. Samtals sóttu þá 1.122 þúsund gestir lónið og fjölgaði þeim um liðlega tvö hundruð þúsund milli ára. Tekjur af sölu í lónið námu 45 miljónum evra, rúmum sex milljörðum króna miðað við meðalgengi evru í fyrra, og greiddu gestir því rúmlega 16 milljónir að meðaltali á dag í aðgangseyri í fyrra.