Fjárfestingatekjur TM jukust um 224 prósent á fyrsta fjórðungi

Hagnaður Tryggingamiðstöðvarinnar á fyrstu þremur mánuðum ársins nam samtals 966 milljónum króna borið saman við aðeins 10 milljónir á sama tímabili í fyrra. Þar munar langsamlega mest um að fjárfestingatekjur félagsins voru 1.326 milljónir á fjórðungnum og jukust um 224 prósent á milli ára.

TM hefur af þessum sökum uppfært spá sína umfjárfestingatekjur á árinu og gerir ráð fyrir að þær verði 3.613 milljónir en upphafleg spá hljóðaði upp á 2.347 milljónir. Væntingar eru um betri afkomu á öðrum fjórðungi miðað við fyrri áætlanir.

Þetta kemur fram í afkomutilkynningu frá TM en þar er haft eftir Sigurði Viðarssyni, forstjóra félagsins, að afkoman hafi verið „mjög góð og langt umfram væntingar“ sem skýrist af fjárfestingastarfseminni. „Afkoma af vátryggingastarfsemi var í takti við spár og ánægjulegt að sjá að vátryggingastarfsemin heldur sama takti og árið 2016 með 97% samsettu hlutfalli undanfarna 12 mánuði.“

Gert er ráð fyrir að samsetta hlutfallið muni batna og verði um 94 prósent á árinu 2017. Þá segir í tilkynningu TM að fyrstu þrír mánuðir ársins séu yfirleitt tjónaþungir og var samsett hlutfall 106 prósent samanborið við 107 prósent á sama tímabili 2016. Þrátt fyrir að framlegð af vátryggingastarfsemi TM hafi batnað lítillega á milli ára var hún neikvæð um 225 milljónir.

TM skilaði um 5,2 prósent ávöxtun á fjárfestingaeignir sínar en það var fyrst og fremst góð afkoma af hlutabréfum sem skýrir mikinn vöxt í fjárfestingatekjum á fjórðungnum. 

„Þannig var afkoma af óskráðum hlutabréfum góð en að hluta til skýrist það af eignarhlut TM í Kvitholmen. Eins og kom fram í tilkynningu TM til Kauphallar þann 21. febrúar síðastliðinn þá bókfærðust rúmar 300 milljónir á fyrsta fjórðung vegna viðskipta með hluti í Kvitholmen. Þá var afkoma af skráðum hlutabréfum jafnframt mjög góð eða rúm 14%,“ segir í tilkynningu TM.