Stjórnarformaður Arion banka hættir og Guðrún Johnsen tekur við

Monica Caneman hefur ákveðið að láta af stjórnarsetu í Arion banka en hún hefur gegnt stjórnarformennsku í bankanum frá árinu 2010. Guðrún Johnsen, sem hefur verið varaformaður á tímabilinu, tekur við sem stjórnarformaður bankans.

Þetta kemur fram í tilkynningu frá Arion banka en þar er haft eftir Monicu að nýlegar breytingar á eignarhaldi bankans marki ákveðin þáttaskil. „Frekari breytingar á eignarhaldi munu eiga sér stað á næstunni og nýr kafli er því að hefjast. Ég tel rétt á þessum tímapunkti að láta öðrum eftir stjórnarformennsku.“

Tilkynnt var um kaup bandarískra vogunarsjóða og Goldman Sachs á samanlagt tæplega 30 prósenta hlut í bankanum í mars síðastliðnum. Þá hefur fjárfestahópurinn jafnframt kauprétt á liðlega 22 prósenta hlut í viðbót síðar á árinu samhliða því að stefnt er að skráningu bankans á markað.  

Monica segir að það hafi verið ánægjulegt að taka þátt í uppbyggingu bankans á undanförnum sjö árum og upplifa þær jákvæðu breytingar sem hafa átt sér stað á þeim tíma.

„Þetta hefur verið viðburðaríkur tími þar sem bankinn, rétt eins og íslenskt efnahagslíf, hefur styrkst á öllum sviðum. Arion banki nýtur nú góðrar stöðu á þeim mörkuðum sem hann starfar og er fjárhagslega sterkur. Mikilvægasti drifkraftur bankans er frábært starfsfólk sem hefur staðið sig virkilega vel á undanförnum árum við að byggja upp góðan banka.“