Sjóður Gamma lánar fyrir íbúðakaupum

Lánasjóðurinn Framtíðin, sem er fjármagnaður í gegnum skuldabréfasjóði í stýringu hjá fjármálafyrirtækinu Gamma, hefur fengið leyfi Fjármálaeftirlitsins (FME) til að bjóða fasteignalán. Sjóðurinn hefur boðið námslán síðustu tvö ár og bætast nú við viðbótarlán vegna íbúðarkaupa með verðtryggðum vöxtum sem ráðast af því hversu mikið eigið fé lántakandinn leggur til.

„Við fengum skráningu sem lánveitandi hjá FME þann 1. apríl eða sama dag og ný lög um fasteignalán til neytenda tóku gildi. Henni fylgir ákveðin upplýsingaskylda og við þurfum að senda FME skýrslur mánaðarlega. Á heimasíðu okkar verður reiknivél þar sem hægt verður að slá inn ýmsar forsendur og sjá hvaða vextir eru í boði. Þeir ráðast af markaðskjörum og geta verið breytilegir,“ segir Hrólfur Andri Tómasson, framkvæmdastjóri Framtíðarinnar.

Fyrirtækið ætlar að bjóða „sérsniðna vexti“ sem lækka eftir því hversu mikið eigið fé er lagt fram í hlutfalli við verð fasteignar. Um er að ræða viðbótarlán, til að hámarki 25 ára á öðrum eða þriðja veðrétti, frá einni og upp í átta milljónir króna. Ekki verður lánað fyrir kaupum á eignum sem kosta meira en 55 milljónir. 

Hrólfur segir lánin koma til með að henta þeim sem eiga ekki fyrir útborgun í íbúð. Aðspurður svarar hann að þau muni einungis gera lántakendum kleift að skuldsetja sig um sem nemur 90 prósentum af verði fasteigna. Fyrirtækið muni bjóða samkeppnishæfa vexti en markmið laganna sem Hrólfur vísar til er jafnframt að stuðla að ábyrgum lánveitingum og sporna við óhóflegri skuldsetningu neytenda.

„Og við munum fara sérstaklega yfir verð í kaupsamningi til að fullvissa okkur um að um markaðsverð sé að ræða. Við erum nýr aðili á fjármálamarkaði og erum alfarið á netinu. Við sjáum mikil tækifæri fram undan en það eru búnar að vera miklar breytingar á þessum markaði undanfarið og verða enn þá meiri á næstu misserum. Það er enginn annar að bjóða eingöngu þessi viðbótarlán eins og stendur og það er okkar nálgun að bjóða eitthvað nýtt.“