Erlendir stjórnarmenn borga tekjuskatt á Íslandi af milljarða bónusum

Þrír erlendir stjórnarmenn Glitnis HoldCo, eignarhaldsfélags sem var stofnað á grunni eigna slitabús Glitnis banka í kjölfar nauðasamninga í árslok 2015, munu allir þurfa að greiða tekjuskatt á Íslandi af um 1.800 milljóna króna bónusgreiðslum sem er áætlað að þeir fái samanlagt í sinn hlut. Þetta kemur fram í fundargerð aðalfundar Glitnis sem var haldinn 26. apríl síðastliðinn og Markaðurinn hefur undir höndum.

Þá segir einnig í fundargerðinni, í tengslum við skriflegt svar við fyrirspurn sem var lögð fyrir stjórnina í aðdraganda aðalfundar, að auk erlendu stjórnarmannanna séu fimm íslenskir starfsmenn hluti af hinu umfangsmikla bónus­kerfi Glitnis sem var samþykkt á aðalfundi félagsins í mars í fyrra. Glitnir hyggst greiða þessum hópi starfsmanna – samtals átta manns – um 23 milljónir evra, jafnvirði um 2,7 milljarða króna, í bónusa, eins og upplýst var um í Markaðnum í síðustu viku.

Bróðurparturinn af þeirri fjárhæð, eða um 74 prósent, rennur í skaut stjórnarmanna Glitnis og munu greiðslur og launatengd gjöld félagsins að óbreyttu nema um tveimur milljörðum vegna bónusa til þeirra. Fram kemur í fundargerðinni að launatengd gjöld nemi um tíu prósentum af þeirri heildarfjárhæð sem hefur verið bókfærð í ársreikningi vegna áætlaðra bónusgreiðslna. Stjórnarmennirnir geta því vænst þess að fá að meðaltali á mann um 600 milljónir og skattgreiðslur til ríkisins vegna þeirra bónusa munu nema hundruðum milljóna.

Afgangurinn af bónuspotti Glitnis fer sem fyrr segir til fimm íslenskra starfsmanna félagsins en að frádregnum launatengdum gjöldum munu þær greiðslur nema samtals um 630 milljónum. Íslenskir stjórnendur Glitnis sem munu þar fá hlutfallslega mest í sinn hlut eru Ingólfur Hauksson, forstjóri félagsins, Snorri Arnar Viðarsson, forstöðumaður eigna­stýringar, og Ragnar Björgvinsson aðallögfræðingur. Bónusar til íslenskra starfsmanna eru skattlagðir eins og launatekjur og þurfa þeir því að greiða 46,24 prósenta tekjuskatt af þeim greiðslum. 

Fréttin birtist fyrst í Markaðnum, fylgiriti Fréttablaðsins um viðskipti og efnahagsmál.