Þorlákshöfn nú tengd beint við Rotterdam

Beinar siglingar færeyska skipafélagsins Smyril Line Cargo milli Íslands og Evrópu eru hafnar og kom vöruflutningaferjan Myki­nes til hafnar í Þorlákshöfn í fyrsta sinn í gær. Vegna flutninganna hefur sveitar­félagið Ölfus ráðist í hafnarbætur í Þorlákshöfn.

Linda Björk Gunnlaugsdóttir, framkvæmdastjóri Smyril Line Cargo á Íslandi, segir að farmur Mykiness í þessari fyrstu ferð séu mest bifreiðar, vinnutæki og stórar vélar, ásamt byggingarefni og neytendavörum. Með skipinu til baka til Rotterdam verða mestmegnis fluttar út sjávarafurðir.

„Mykinesið hefur hreppt alls konar veður á leiðinni, en hefur sannað að það er gott sjóskip. Allar áætlanir okkar hafa staðist og þetta er gleðilegur dagur fyrir okkur,“ segir Linda Björk sem finnur fyrir því að markaðurinn sé að bregðast við nýjum kosti í flutningum og samkeppninni sem honum fylgir.

„Löndunum í Þorlákshöfn hefur fjölgað og umsvif í höfninni hafa aukist. Við erum búin að gera samninga við fyrirtæki í bænum til að vinna með okkur,“ segir Linda og nefnir Kuldabola, sem rekur frystivöruhótel og Fiskmarkað Íslands.

Ákveðið hefur verið að halda úti vikulegum siglingum milli Þorlákshafnar og Rotterdam, en þó einungis boðið upp á vöruflutninga á nýju siglingaleiðinni. Fest voru kaup á ferjunni Mykines sérstaklega vegna verkefnisins.

Ferjusiglingarnar munu stórauka umsvif í Þorlákshöfn og væntingar eru um að þær stuðli að enn frekari vexti og atvinnuuppbyggingu á svæðinu. Horft er til þess að nýja siglingaleiðin skapi einnig tengimöguleika við önnur markaðssvæði, til dæmis Pólland og Eystrasaltslöndin, með vöruumskipun í Færeyjum þaðan sem Smyril Line Cargo er með tvær vöruflutningaferjur í áætlunarsiglingum til St. Pétursborgar og Eystrasaltslandanna.

Miklar breytingar hafa verið gerðar á höfninni í Þorlákshöfn á undanförnum árum til að skapa betri aðstæður fyrir hafsækna starfsemi og frekari framkvæmdir eru á döfinni. Höfnin hefur verið dýpkuð til muna og byggð verður upp aðstaða til að taka á móti stórum flutningaskipum.