Rauðar tölur í Kauphöllinni og krónan veikist

Hlutabréf í öllum félögum á aðalmarkaði Kauphallar Íslands hafa lækkað eða staðið í stað það sem af er degi. Aftur á móti hafa viðskipti dagsins einkennst af lítilli veltu. Þá hefur íslenska krónan veikst gagnvart öllum helstu gjaldmiðlum.

Bréf í Eik fasteignafélagi hafa lækkað um 2,5 prósent og hlutir í HB Granda um rétt rúm tvö prósent. Þegar þessi frétt er skrifuð hafa einungis Marel, Nýherji og Össur staðið í stað af þeim sautján félögum sem eru á aðalmarkaðnum.

Krónan hefur það sem af er degi veikst um 1,45 prósent gagnvart pundinu og 0,7 prósent gagnvart Bandaríkjadal. Síðustu tvær vikur hefur pundið styrkst um tólf prósent gagnvart krónunni.