Umfang vogunarsjóðanna kom lífeyrissjóðunum á óvart

Samningaviðræður voru komnar á lokastig um kaup lífeyrissjóðanna á umtalsverðum hlut í Arion banka þegar Kaupþing kaus að taka hlé til að ljúka viðræðum við hluta af eigendum sínum. Þau kaup sem þar raungerðust urðu umfangsmeiri en lífeyrissjóðunum hafði áður verið kynnt og eru af þeim sökum nokkurt undrunarefni. Þetta segir Þórarinn V. Þórarinsson hæstaréttarlögmaður og ráðgjafi lífeyrissjóðanna við kaup á hlut í Arion banka.

„Það hefur verið frá upphafi vitað og út frá því gengið að eigendur Kaupþings myndu kaupa hlut. Lengst af hefur verið talað um að sá hluti verði af stærðargráðunni 20 til 25 prósent. Þannig að umfangið kom okkur á óvart. Sérstaklega að það væri með þeim hætti að það gæti verið kaupréttur,“ segir Þórarinn.

„Við fundum með stýrihóp lífeyrissjóðanna í dag þar sem við endanlega metum hvaða skilaboð felist í þessari framkvæmd,“ segir Þórarinn. Hann segist ekki útiloka áframhaldandi viðræður. Lífeyrissjóðirnir endurmeta nú stöðu sína. Haukur Hafsteinsson, framkvæmdastjóri LSR, segir að farið verði yfir nýjustu fréttir með ráðgjöfum lífeyrissjóðsins. 

Ólafur Sigurðsson, framkvæmdastjóri Birtu lífeyrissjóðs, tekur í sama streng. „Við höfum ekki verið við samningaborðið eins og það heitir. Við höfum lýst yfir áhuga á að ganga til viðskipta við seljandann. Það er ákvörðun stjórnar á hverjum tíma hvort viðræður haldi áfram. Við höfum eðli málsins samkvæmt ekki komið stjórn saman frá því að þessar upplýsingar bárust. Við erum að endurmeta þetta.“

Friðbert Traustason, framkvæmdastjóri Samtaka starfsmanna fjármálafyrirtækja, segist skynja það að fólk hafi áhyggjur af niðurskurði í kjölfar kaupa vogunarsjóðanna á hlutnum. „Það hefur það alltaf. Arion banki var að segja upp fimmtíu manns í haust,“ segir Friðbert. Hann segir alltaf verið að tala um breytingar og hugsanlega enn meiri hagræðingu. Svoleiðis skapi alltaf óróa. „Mér finnst ekki hafa farið leynt, í því sem stjórnendur bankans hafa sjálfir verið að gefa út, að það sé þessi endalausa hagræðing alltaf í gangi og að hún muni halda áfram.“

Nokkur athygli hefur verið vakin á því að raunverulegt eignarhald sjóðanna sem hafa keypt hlut í bankanum sé óljóst. Fjármálaeftirlitið benti á í tilkynningu sem stofnunin sendi frá sér í gær að fjármálafyrirtækjum bæri að tilgreina nöfn og hlutfallslegt eignarhald allra þeirra sem eiga umfram 1 prósent hlutafjár á heimasíðu sinni. Sé lögaðili eigandi hlutafjár umfram 1 prósent skal jafnframt koma fram hvaða einstaklingur eða einstaklingar séu raunverulegir eigendur viðkomandi lögaðila.

Friðbert segir óþægilegt ef eignarhald er óljóst. „Ég held að öllum þyki óþægilegt að vita ekki hverjir eiga fyrirtækið, ekki síst þegar þetta er svona mikilvægt fyrirtæki eins og banki. Í vogunarsjóði höfum við ekki hugmynd um það og það sem meira er, við fáum aldrei að vita það. Það eru svo margir sem koma að málinu. Það er alltaf mjög óþægilegt eignarhald.“ 

Fréttin birtist fyrst í Fréttablaðinu.