Hreykja sér af því að fólk eyði fjórum sinnum meira en það ætlar sér í Costco

„Við viljum vera ómótstæðileg í augum Costco-meðlima. Við hreykjum okkur af því að fólk segi: Í hvert sinn sem ég fer í Costco ætla ég að eyða 50 dollurum en enda á að eyða 200. Og það er vegna þess að kjörin eru svo góð.“

Þetta segir Steve Pappas, aðstoðarforstjóri Costco, í viðtali við Umræðuna á heimasíðu Landsbankans. Um tveir mánuðir eru í að vöruhús Costco verði opnað í Kauptúni en Pappas á ekki von á því að fleiri Costco vöruhús verði opnuð hér á landi þótt hann útiloki ekki neitt.

Engar kristalsljósakrónur

Vöruhúsið verður 14 þúsund fermetrar og hefur hrátt yfirbragð, eins og hin 785 að sögn Pappas.

„Það er enginn glans. Það er enginn marmari, engar kristalsljósakrónur. Við klippum allan þann kostnað út. Við viljum að það sé hægt að keyra með vörurnar upp að húsinu, taka þær úr bílnum og setja vörubrettin beint inn á gólf með sem allra minnstri fyrirhöfn. Hjá okkur gengur allt út á hagkvæmni,“ segir Pappas.

Eins og fjallað var um á Vísi fyrr í dag er ýmislegt öðruvísi hjá Costco en fólk á að venjast. Fólk á ekki kost á því að máta fötin sem það kaupir en þess í stað er ekkert tiltökumál að skila fötunum og fá þau endurgreidd. Þá skoðar öryggisvörður körfurnar á leiðinni út og engir hraðkassar eru á staðnum.

Ætlar að kaupa kjúkling en kaupir golfkylfur

Upplifunin er stór hluti af ferð í Costco að sögn Pappas. Þar sjái fólk Bang & Olufsen-græjur, demantshringi sem kosti átta milljónir króna og svo sé alltaf hægt að ganga að tíu kílóa poka af sykri vísum. Skartgripir, græjur og matvara í sömu verslunarferð er daglegt brauð í Bandaríkjunum en ekki eitthvað sem Íslendingar hafa mátt venjast þegar þeir „skreppa út í búð.“

Vörutegundir í Costco hverju sinni eru um 3800 að sögn Pappas en yfir árið séu þær nær tólf þúsund. Þetta sé vegna árstíðabundinna vara en vörurnar skiptist í raun í þrjár flokka; vörur sem alltaf eru í boði eins og flest matvara, árstíðabundnar vörur eins og útilegubúnaður og jóladót og að lokum tækifærisvörur sem fólk ætlaði sér aldrei að kaupa þegar það mætti.

„Það er galdurinn við Costco – fólk kaupir aldrei bara það sem það ætlaði sér. Þú mætir kannski til að kaupa þér grillaðan kjúkling og sjampó en sérð svo tilboð á golfkylfum sem þú getur ekki látið fram hjá þér fara. Ofan á þetta leggjum við mikið upp úr því að bjóða fólki að smakka og prófa áður en það kaupir, auk þess sem við erum með annars konar þjónustu á borð við gleraugnadeild og sjónmælingar, apótek, dekkjaverkstæði og veitingatorg. Allt vinnur þetta saman að því að gera ferðina í Costco að ævintýri.“