Hæstiréttur vísaði 186 milljóna skaðabótamáli 66°Norður frá

Hæstiréttur vísaði í dag máli frá héraðsdómi þar sem maltverska félagið Molden Enterprises Limited hafði verið dæmt til að greiða 66°Norður (Sjóklæðagerðinni hf.) alls 186 milljónir króna. Molden var dæmt í Héraðsdómi Reykjavíkur í mars í fyrra til að greiða fataframleiðandanum vegna dómsmáls sem fyrrverandi forstjóri 66°Norður höfðaði gegn því og vann.

Hæstiréttur vísaði dómnum frá því í mars frá og tók undir með lögmanni Molden Enterprises um að 66°Norður gæti ekki nýtt sér varnarþingsákvæði kaupsamnings sem undirritaður var í júní 2011 og stefnt maltverska félaginu hér á landi. Félagið SF II, í eigu núverandi eigenda 66°Norður, hefði aftur á móti verið aðili að þeim samningi þegar það keypti 51 prósent í fataframleiðandanum af Molden. Í kaupsamningum var ákvæði um að ef kæmi upp ágreiningur bæri Molden og SF II skylda til að reka mál vegna hans fyrir Héraðsdómi Reykjavíkur. 

„Stefndi [66°Norður] var ekki aðili að ofangreindum kaupsamningi, þótt samningurinn hafi varðað hagsmuni hans og áfrýjandi [Molden Enterprises] hefur ekki fyrir sitt leyti gengist undir að mál á hendur sér um þá hagsmuni stefnda verði rekið fyrir Héraðsdómi Reykjavíkur. Verður áfrýjanda því ekki gert að sæta því að stefndi reki fyrir Héraðsdómi Reykjavíkur mál á hendur honum um hagsmuni sína í skjóli varnarþingsákvæðis umrædds kaupsamnings,“ segir í dómi Hæstaréttar.

66°Norður höfðaði málið á sínum tíma á þeirri forsendu að Molden, sem hét áður Egus Ing. og var á þeim tíma í eigu kvikmyndaframleiðandans Sigurjóns Sighvatssonar, hefði lofað að greiða félaginu kostnað vegna starfsloka Halldórs Gunnars Eyjólfssonar, fyrrverandi forstjóra fyrirtækisins. Í kaupsamningi Molden og SF II hafi verið ákvæði um að fyrrnefnda félagið ábyrgðist að kaupréttur sem Halldór átti samkvæmt ráðningarsamningi væri fallinn úr gildi í júní 2011. Ef til málaferla um kaupréttinn kæmi myndi maltverska félagið bæta íslenska fyrirtækinu allan kostnað sem væri umfram það sem leiddi af uppgjöri ráðningarsamnings forstjórans.

Halldór Gunnar höfðaði mál á hendur 66°Norður í mars 2012 og rúmum tveimur árum síðar staðfesti Hæstiréttur að fyrirtækið þyrfti að greiða honum 110 milljónir vegna kaupréttarins. Lögmenn Molden önnuðust málareksturinn í nafni 66°Norður í samræmi við ákvæði kaupsamningsins.