Segir áhyggjur yfir eignarhaldi skiljanlegar

Framkvæmdastjóri Samtaka fjármálafyrirtækja segir skiljanlegt í ljósi sögunnar að almenningur hafi áhyggjur af eignarhaldi á íslenskum bönkum. Hins vegar búi Fjármálaeftirlitið yfir öflugum úrræðum og landsmenn þurfi á ákveðnum tímapunkti að byrja að treysta regluverkinu.

Katrín Júlíusdóttir, framkvæmdastjóri Samtaka fjármálafyrirtækja, var meðal gesta Kristjáns Kristjánssonar í þættinum Sprengisandi á Bylgjunni í morgun.

Katrín var meðal annars spurð um kaup vogunarsjóða á tæplega 30 prósenta hlut í Arion banka. Hún sagði samtökin ekki hafa sérstaka skoðun á eignarhaldi á fjármálafyrirtækjum

„En sem borgari í þessu landi og sem fyrrverandi Alþingismaður og allt það, þá finnst mér skipta mestu máli að við séum með regluverk sem sé í lagi. Það er að segja að við séum með regluverk sem að haldi það vel, að við þurfum ekki alltaf að hlaupa upp til handa og fóta þegar að hlutir skipta um eigendur,“ sagði Katrín.

Hún sagði að frá hruni hefðu verið gerðar miklar breytingar á regluverkinu í kringum íslensk fjármálafyrirtæki.

„Og það er orðið býsna gott og það hefur komið fram að það er meira að segja að mörgu leyti strangara en í Evrópu, en við erum líka búin að innleiða einhverjar 40 tilskipanir frá Evrópu um fjármálamarkaði. Hluti af því er til dæmis að Fjármálaeftirlitið er komið með geysilega öflug tæki til að grípa inn í.“

Nefndi Katrín meðal annars heimild Fjármálaeftirlitsins til að svipta eiganda í fjármálafyrirtæki atkvæðisrétt ef eftirlitið telur hann ekki hæfan. Þá sagði hún skiljanlegt í ljósi sögunnar að fólk hafi efasemdir um þá aðila sem nú hafa eignast hlut í Arion banka.

„Ég mæli samt með því að fólk fari inn á Fme.is, og þar er mjög skilmerkilega sett fram allt þetta regluver, og fólk kynnis sér það. Vegna þess að það er gríðarlega öflugt,“ sagði Katrín Júlíusdóttir.

Umræðan í heild sinni. Þátturinn allur.