Einar Örn býður sig fram í stjórn TM

Einar Örn Ólafsson, fyrrverandi forstjóri Skeljungs, hyggst bjóða sig fram í stjórn TM á aðalfundi félagsins þann 16. mars. Þetta staðfestir hann í samtali við Markaðinn.

Fjárfestingarfélagið Einir ehf., í eigu Einars Arnar, er í hópi tíu stærstu hluthafa tryggingafélagsins. Á meðal annarra stórra hluthafa sem standa að baki framboði hans má nefna eignarhaldsfélagið Helgafell ehf., í eigu Bjargar Feng­er, eiginkonu Jóns Sigurðssonar stjórnarmanns í N1, og fjölskyldu hennar.

Einir og Helgafell eiga samanlagt um níu prósenta hlut í TM. Félögin voru ekki hluthafar í tryggingafélaginu þegar síðasti aðalfundur þess var haldinn 17. mars í fyrra. Einir á 2,76 prósenta hlut í fyrirtækinu og er því tíundi stærsti hluthafinn. Helgafell heldur á 6,34 prósentum, er sjötti stærsti eigandinn, en Jón Sigurðsson stýrir fjárfestingum félagsins.

Einar Örn byrjaði að kaupa bréf í TM í byrjun síðasta haust. Lífeyrissjóður verslunarmanna er stærsti eigandi TM með 9,6 prósenta hlut. Gildi lífeyrissjóður og hlutabréfasjóður í rekstri sjóðastýringarfyrirtækisins Stefnis koma þar á eftir með 8,7 og 8,1 prósent. Birta lífeyrissjóður á 7,6 prósent í fyrirtækinu sem er skráð á Aðallista Kauphallar Íslands. Einir og Helgafell eru því stærstu einkafjárfestarnir í hluthafahópi TM.

Stjórn tryggingafélagsins er í dag skipuð fimm aðalmönnum og er Örvar Kærne­sted, sjálfstætt starfandi fjárfestir, stjórnarformaður þess. TM skilaði 2,6 milljarða króna hagnaði í fyrra samanborið við 2,8 milljarða árið 2015.

Fréttin birtist fyrst í Markaðnum, fylgiriti Fréttablaðsins um viðskipti og efnahagsmál.