Reglurnar eiga ekki við um formann Icelandair

Ekki hefur verið rætt um að Úlfar Steindórsson láti af stjórnarsetu í Lífeyrissjóði verslunarmanna (LV) eftir að hann var kjörinn stjórnar­formaður Icelandair. LV á um fimmtán prósenta hlut í flugfélaginu.

Úlfar er tilnefndur til stjórnarsetu í LV af Samtökum atvinnulífsins. Á stjórnarfundi SA í upphafi árs voru samþykktar reglur um tilnefningar samtakanna í stjórnir lífeyrisjóða. Í fjórðu grein þeirra segir að stjórnarmenn skuli ávallt huga að eigin hæfi og gæta þess að ekki skapist hætta á hagsmunaárekstrum.

Þá skulu stjórnarmenn tilnefndir af SA ekki gefa kost á sér til stjórnarsetu í félögum þar sem viðkomandi lífeyrissjóður tilnefnir stjórnarmenn, beitir atkvæðarétti í stjórnarkjöri eða á þátt í tilnefningu stjórnarmanns. Reglurnar tóku gildi 1. janúar 2017.

Úlfar var endurkjörinn í stjórn Icelandair, tveimur mánuðum eftir að reglurnar tóku gildi, síðastliðinn föstudag en hann hefur setið í stjórninni síðan 2010. Hann var kjörinn formaður af nýrri stjórn. Aðspurður sagði Úlfar að það væru engar reglur eða lög sem gerðu kröfu um að hann hætti í stjórn LV í kjölfar kjörsins.

„Ég vissi ekki af reglunum. Hefði ég vitað af þeim hefði ég sagt svo,“ segir Úlfar eftir að honum var bent á ákvæði hinna nýju reglna. Það hafi ekki verið rætt við hann um málið enda stutt síðan aðalfundur Icelandair var haldinn. „Þegar ég var beðinn um að setjast í stjórn LV þá var ég fyrir í stjórn Icelandair. Ef SA hafa sett þessar reglur þá hljóta þeir að koma til mín og láta mig vita af þeim.“

Fyrir tveimur vikum auglýsti SA eftir stjórnarmönnum í lífeyrissjóði. Samtökin skipa helming stjórnarmanna í þeim sjö lífeyrissjóðum sem eru á samningssviði aðila og er framkvæmdastjórn SA falin tilnefning stjórnarmanna. Sérstök hæfisnefnd fjallar um einstaklinga sem gefið hafa kost á sér til stjórnarstarfa.

„Við hugsuðum reglurnar fyrir nýja stjórnarmenn sem við myndum skipa eftir setningu reglnanna en ekki fyrir eldri stjórnarmenn,“ segir Halldór Benjamín Þorbergsson, framkvæmdastjóri SA. Ekki hafi verið farið yfir stöðu Úlfars en það komi til greina.

Fréttin birtist fyrst í Fréttablaðinu.