Árleg spá Capacent gerir ráð fyrir hefðbundnum jólum

Capacent hefur birt jólaspá sína þar sem farið er yfir mögulegar verðbreytingar í aðdraganda jólanna og „jólavísitalan“ birt. Spáin gerir ráð fyrir „týpískum jólum“. 

Segir í tilkynningunni að af einhverjum ótrúlegum ástæðum lækki grænmeti í verði á jólunum á meðan að sykur og salt hækki. Krónan hafi styrkst undanfarnar vikur og muni það skila sér í lækkandi verði matvæla. Gert sé ráð fyrir 0,2 prósent lækkun.

Vegna aukinnar samkeppni og sterkrar krónu muni almennt halda aftur af verði á innfluttum varningi. Capacent segir Grýlu hafa haldið sig til hlés og jólakötturinn ekki sést hér á landi í nokkur ár. Amerískur ístrubelgur hafi verið að hrella húsmæður í Garðabæ, en er þar sennilega átt við verslunarrisann Costco sem opnaði dyr sínar fyrr á árinu. Hefðbundnar jólavörur líkt og búsáhöld, skartgripir og bækur munu hækka örlítið. Að sama skapi er gert ráð fyrir örlítilli lækkun á raftækjum og fatnaði.

Dregið hefur úr hækkun á fasteignamarkaði og er gert ráð fyrir 0,5 prósent hækkun fasteignaverðs. Á sama tíma er gert ráð fyrir lækkun bifreiða, svo um nemur 0,05 prósent.

Olíuverð hefur verið stöðugt frá byrjun nóvember og er ekki gert ráð fyrir hækkun í aðdraganda hátíðanna.

Búast má við venjubundinni hækkun flugfélaganna, en Capacent spáir því að hún verði um 20 prósent.

Jólavísitalan hækkar um 0,27 prósent og samkvæmt verðbólguspá mun 12 mánaða verðbólgan hækka úr 1,7 í 1,9 prósent. Búast megi við hinum „týpísku jólum“ að mati Capacent.