Nýr og breyttur GLA frumsýndur

Nýr og breyttur Mercedes-Benz GLA verður frumsýndur hjá bílaumboðinu Öskju nk. laugardag kl. 12-16.  Í nýjum GLA helst í hendur fallegt og kraftalegt útlit, mikil afkastageta og lipurð í meðhöndlun. Kraftalegt yfirbragðið kemur meðal annars af framstuðara með nýju útliti og vatnskassahlíf með götuðum rimum.

GLA fæst nú með fallega hönnuðum LED aðalljósum. Að innan státar GLA af hágæða efnum og vönduðum frágangi eins og Mercedes-Benz er þekkt fyrir. Innanrými GLA býður upp á sportlegt yfirbragð og þægilegt akstursumhverfi. GLA er vel búinn nýjasta aksturs- og öryggisbúnaði frá Mercedes-Benz, m.a. hinu háþróaða 4MATIC fjórhjóladrifi.

Þá er einnig staðalbúnaður í bílnum ATTENTION ASSIST kerfið, sem aðstoðar ökumann að halda einbeitingu þegar á þarf að halda.  GLA er einnig fáanlegur með úrvali akstursstoðkerfa, svo sem athyglisvara, blindblettsvara, Blind Spot Assist, sem stuðlar að auknu öryggi við akreinaskipti. Bílastæðavarinn, Parking Pilot, er ekki síður nytsamlegur valbúnaður. Margvíslegur tæknibúnaður er í boði í GLA, svo sem lykillaus ræsing og bakkmyndavél með 360° yfirsýn fyrir aukið öryggi. Meðal valbúnaðar má nefna Garmin® MAP PILOT leiðsögukerfi.

Meðal aflmikilla og sparneytinna útfærslna er GLA 250 4MATIC sem býr yfir hröðun úr kyrrstöðu í 100 km hraða á klst á einungis 6,6 sekúndum. GLA eyðir frá 4,8 lítrum á hundraðið með 4MATIC fjórhjóladrifinu. Val er um fjölda útfærslna sem draga enn frekar fram alhliða eiginleika bílsins. Þar á meðal er GLA AMG Line, með 19" AMG álfelgum og áberandi AMG útlitsatriðum á yfirbyggingu, og GLA WhiteArt Edition með svörtum, hágljáandi listum og áþrykktum röndum á vélarhlíf og á þaki í keppnisstíl.