Smá glerkúla dældaði pressuna

Finnsku Hydraulic Press hjónin tóku sig til og birtu í gær myndband þar sem þau nota stóra vökvapressu til að kremja litla glerkúlu. Kúlan var þó það sterk að hún gerði dæld á pressuna. Óhætt er að segja að þau hafi náð nokkuð einstökum árangri með tilraun sinni.

Auk þess að kremja kúluna krömdu þau einnig ketilbjöllu úr gleri og stórt stykki úr endurunnu gleri, en það er í raun aukaatriði.

Glerkúlur sem þessar ganga undir nafninu Prince Rubert‘s Drop, eða Dropi Rúberts prins, héðan í frá PRD til að einfalda hlutina. Þær eru nokkuð merkilegar fyrir þær sakir að í raun eru þær sterkari en stál, en í senn mjög viðkvæmar. Meira um það neðar.

PRD er sem sagt bráðið gler sem er látið leka ofan í kalt vatn, eins og sjá mátti í upphafi mynbandsins hér að ofan. Við það verður til eins konar dropi úr gleri með langan og mjóan hala.

Dropinn sjálfur er einstaklega harður, en halinn mjög viðkvæmur. Með því að brjóta halann myndast höggbylgja sem lætur PRD springa út á við á augabragði. Það er í raun nóg að koma halanum á hreyfingu til að mynda höggbylgjuna sem sprengir dropann.

Erfitt er að átta sig á því sem gerist án háhraðamyndavélar.

Þó er hægt að berja á dropann sjálfan með hamri og jafnvel skjóta hann með byssukúlu, án þess að hann brotni.

Svokallaðir „Youtubearar“ hafa margsinnis framkvæmt hinar ýmsu tilraunir með PRD, en líklega enginn meira en Destin Sandlin hjá Smarter Every Day. Hann hefur meðal annars sýnt fram á að það er hægt að skjóta dropann án þess að hann brotni. Höggið sem kemur frá byssukúlunum veldur því þó að halinn hristist og dropinn springur.

Fyrir forvitna lesendur Vísis má benda á myndbandið hér að neðan, sem ætlað er sem kennslumyndband fyrir efnafræðikennara. Þá má dropann brotinn í vökvapressu á 380 þúsund römmum á sekúndu. Hér má svo sjá hvernig hægt er að búa til PRD.