Borgward hefur sölu í Evrópu í byrjun næsta árs

Evrópubúar geta valið úr einu bílamerki enn á næst ári því kínversk-þýska bílafyrirtækið Borgward mun bætast við bílaflóru álfunnar og það strax á fyrsta ársfjórðungi. Borgward er fornfrægt þýskt bílamerki sem reist var upp úr öskustónni fyrir örfáum árum síðan með kínversku fjármagni.

Nú eru Borgward bílar framleiddir í Kína og þeir bílar sem seldir verða í Evrópu munu koma þaðan. Borgward ætlar að hefja söluna í upprunalandinu Þýskalandi og það í upphafi aðeins með einni bílgerð, jeppann BX7. Sá bíll hefur selst ágætlega í Kína. Hann er á stærð við Audi Q5 og þónokkur íburður er í honum líkt og í þeim þýska.

Borgward mun svo fjölga bæði löndunum í Evrópu og bílgerðunum sem þar skal selja, en minni BX5 jepplingur mun fylgja í kjölfarið. Borgward BX7 jeppinn er í grunngerð boðinn með 224 hestafla 2,0 lítra bensínvél sem togar 300 Nm. Hann kostar í sinni ódýrustu útfærslu 26.000 evrur í Þýskalandi, eða 3,2 milljónir króna og er því talsvert ódýrari bíll en Audi Q5, hans helsti keppinautur, að mati Borgward.

Borgward ætlar ekki að fara hefðbundnar leiðir við sölu bíla sinna í Evrópu og setja upp sýningarsali um víðan völl. Þess í stað verður lögð aðaláhersla á að selja bíla Borgward gegnum vefinn og halda með því kostnaði við markaðssetningu í algjöru lágmarki og verði bílann í leiðinni.